Pinngitsaaliissummik napparsimavimmut unitsinneqartartut ikiliartorput

Inatsisartuni ullumi pingasunngornermi oktobarip pingajuanni inatsisissatut siunnersuut ’Tarnimikkut nappaatilinnik kiffaanngissusiiaasarneq allatullu pinngitsaaliisarneq pillugit Inatsisartut inatsisaat’ siullermeerlugu oqaluuserineqassaaq. Nunatsinni pinngitsaaliissummik napparsimavimmut unitsinneqartut ilaatigut pisinnaatitaaffiisa illersorneqarnissaat siunertaralugu suliaavoq, saniatigut Dronning Ingridip Napparsimavissuani tarnimikkut nappaatilinnut immikkoortortaqarfimmi qanoq suleriuseqartoqarsinnaassanersoq aalajangersorneqarluni inatsisissami allaqqavoq.

Pinngitsaaliissummik Dronning Ingridip Napparsimavissuanut unitsinneqartartut ikiliartortut tarnip nappaataanut A1-imi nakorsaanerup Poul Bisgaardip oqaatigaa.

- Qujanartumik maani napparsimasut amerlanerpaartaasa ikiorneqarnissartik nammineq piumasarpaat nakorsarneqarusuttarlutillu. Ukiut kingulliit marluk ingerlaneranni 2011-mi 2010-milu pinngitsaaliissummik napparsimavimmut inuit 15-it aamma 16-it unitsinneqarput, qangaanerusumut sanilliullugu unitsinneqartartut affaannanngornikuupput. Taamaattumik pinngitsaaliissummik napparsimavimmut unitsinneqartartut ikiliartorput. Pissutaasut ilagaat sinerissamiittunut attaveqarneq pitsaanerulermat suliniut nutaaq telepsykiatri atorneqalermat napparsimasunut, Dronning Ingridip Napparsimavissuani tarnip nappaataanut nakorsaaneq Poul Bisgaard oqarpoq.

Telepsykiatri atorlugu sinerissami tarnimikkut napparsimasut nakorsaq isigiitigalugu oqaluussinnaasarpaat. Qarasaasiakkut attaveqarluni nakorsaq napparsimasorlu imminnut isigiitigalutik oqaluussinnaanerat attaveqaqatigiinnermut assut iluaqutaavoq. Qangaanerusoq pinngitsaaliissummik napparsimavimmut unitsinneqartartut taamaalillutik ikilipput, najugarisaq qimannagu nakorsartinneq periarfissaalermat.      

-Pisariaqanngitsumik pinngitsaaliissutit pinaveersaartittarpagut, tamarmillu nalunaarsorneqartarput. Aatsaat napparsimasoq ikiorneqarnissaanut atatillugu pisariaqavikkaangat pinngitsaaliineq atorneqartarpoq, taama nakorsaaneq Poul Bisgaard oqarpoq.