Pinngitsaaliissummik arsaarinninnerit suliamut paasisimasaqarnerusunit aalajangiiffigineqartalerlik
Inuit susassaqarfimmut immikkut ilisimasallit taamatut aalajangiisartuusuuppata pissusissamisoornerussagaluarpoq. Taamaaliornikkut suliamut paasisimasaqarluarnissaq qulakkeerneqassagaluarmat. Ilaqutariinnut attuumassuteqartunut toqqissisimanarnerussaaq aammalu politikerinut akisussaaffimmik taama angitigisumik tigusinissaminnut ilinniarsimanngitsunut tulluarnerpaassagaluarpoq.
-Aalajangiisoqartarnera apeqqusinngilara, ilaatigummi ajoraluartumik tamanna pisariaqartarmat. Qinikkanilli inaarutaasumik aalajangiiffigineqartarnera pissusissamisoorsorinngilara. Taamatummi aalajangiinermi suliatigut naliliinerit kisiisa atorneqartariaqarput sukkasuumillu aalajangiiffigineqarlutik, politikkikkullu akuliuffigineqartarnera piiginnarlugu. Maalaarutinut tunngatillugu ilaatigut taamaaliortoqarsinnaavoq, sulialli suliarineqarnerani aalajangiiffigeqqaarneranilu peqataatinnagit, Justus Hansen, Demokraatit tunuliaqutaralugit Kommuneqarfik Sermersuumi kommunimut qinigassanngortittoq isumaqarpoq.
Qinikkatut taama ittunik aalajangiinissamut suliatigut piginnaaneqarneq eqqortumillu aalajangiinissamik qulakkeerinissaq qaqutigoortuuvoq. Angajoqqaatut sorpassuarnik ilinniartoqartaraluarpoq, namminerli pitsaasumik toqqissisimanartumillu peroriartorsimagaanni misilittagaqarfineqarneq ajorpoq. Taamaammat paasiuminaassinnaavoq sooq qinikkat aalajangiinerini taama annertutigisuni piginnaasaqarfii naammagineqartarpata, soorlu ullumi kommunit tungiuinermut ataatsimiititani taamatut pisoqartartoq.
-Meeqat pillugit, sukkasuumik ikiorneqarnissaat anguniarlugu ullumikkumullu naleqqiullugu suliamut paasisisimasaqarnerusunissaq anguniarlugu, kommunini allaffissornikkut suliat politikkikkut akuliuffigineqartarneri peerneqartariaqarpoq, aatsaallu immikkut ittumik maalaaruteqartoqartillugu politikkikkut akuliuttoqartarluni. Tamanna meeqqanutn pitsaanerpaassanasoraara. Neriuppunga kikkulluunniit meeqqanut ulluinnarni akisussaasuusut isummersuutigisama oqallisiginissaannut peqataarusussasut pissutsinillu allanngueqataallutik. Oqariartuutigaara pinngitsaaliissumik arsaarinninnermut tunngatillugu meeqqat inuusuttullu suliamut paasisimasaqarnerunissamik politikkimillu annikinnerusumik pisariaqartitsimmata, Justus Hansen isumaqarpoq.
