Pinngitsaaliisoqarlunilu ikuallatsitseriaraluartoqarpoq
Sapaatip-akunnerani kingullerni qaammammusisoqarnera politiit malugilluarsimavaat, angerlarsimaffinni eqqissiviilliortitsinerit isertitsivinnilu unnuisitsinerit amerlasimapput. Aamma Nuummi angut niviarsissamik pinngitsaaliisimasutut tigummigallagassanngortinneqarpoq. Aamma Tasiilami arnaq aapparminik ikuallatseriaraluarsimavoq.
Niviarsiaq 14-nik ukiulik nammineerluni politiinut sianerpoq, angummit 41-nik ukiulimmit imigassartorsimasumit pinngitsaalineqarsimalluni.
- Angut eqqartuussivimmut arfininngormat sassartipparput novemberillu qulingiluaanut tigummineqarallassaaq. Nuummi politeeqarfiup pisortaa Karl Henrik Simonsen nassuiaavoq.
Nuummi angerlarsimaffinni eqqissiviilliortitsinerit politiinit orninneqartariaqarsimasut tallimaapput, aamma aalakoorpallaat arfinillit isertitsivimmi unnuisinneqartariaqarsimapput. Taamatuttaaq meeraq tallimanik ukiulik paarineqanngitsoq politeeqarfiliaanneqarsimavoq, arnaa aanaavalu aalakoorsimammata. Taamaattumik kommunemi isumaginnittoqarfimmi pigaartoq attaveqarfigineqartariaqarsimasoq politiit erseqqissaatigaat.
Tasiilami aamma pinartoqarsimavoq. Arnap 44-nik ukiullip aappani 53-nik ukiulik arfininngormat ikuallatseriaraluarsimammagu ulluni 15-ini tigummineqarallartussanngorpoq. Angut pineqartoq uutitingaatsiarsimavoq.
- Aappariit ikuallatsitseriarnerup nalaani aalakoorsimapput, qanorlu pisoqarsimanersoq erseqqissumik nassuiaateqarfigisinnaasimanagu. Tasiilami politeeqarfiup pisortaa Kristian Sinngertaat nassuiaavoq.
Taassuma saniatigut ataasiakkaanik angerlarsimaffinni eqqissiviilliortitsisoqarsimavoq, tillinniartoqarsimallunilu. Illoqqortoormiuni sapaatip-akunnerata naanera eqqissisimasumik atorneqarpoq.
Sisimiuni politiit nalinginnaasumit aamma suliaqarnerusimapput, angerlarsimaffinni eqqissiviilliortitsinerit arfineq-marluk ornittariaqarsimavaat, aalakoorpallaat pingasut isertitsivimmi unnuisinneqartariaqarsimapput kommunemilu isumaginnittoqarfimmi pigaartoq aamma attassuteqarfigineqartariaqarsimalluni.
- Meeraq ataaseq paarineqanngitsoq innuttaasut ilaata siarngutigimmagu kommunemi pigaartoq atassuteqarfigisariaqarsimavarput. Sisimiuni stationslederi Hans Falck Petersen nassuiaavoq.
Qaammammusisoqarnera Qaqortumi politiit aamma malugilluarsimavaat, angerlarsimaffinni eqqissiviilliortitsinerit ataasiakkaaginnaagaluarlutik aalakoorpallaarlutik imminnut aqussinnaanngitsut arfinillit isertitsivimmi unnuisinneqartariaqarsimasut, stationslederi Bent Ole Kleist oqarpoq.
Ilulissanili sapaatip-akunnerata naanera eqqissisimaarfiusimavoq, angerlarsimaffinni eqqissiviilliortitsisunik imaluunnit annersaasunik nalunaaruteqartoqarnanilu isumaginnittoqarfimmi pigaartoq aggersarneqartariaqarsimanngilaq.
- Ataaseq aalakoorpallaarluni isertitsivimmi unnuisittariaqarsimasarput eqqaassanngikkaanni sapaatip-akunnerata naanera pinartoqanngilaq. Ilulissani politeeqarfimmi pisortaq Bent Heiselberg nassuiaavoq.
