Pinngitsaaliisimasutut toqutseriarsimasutullu pisuutinneqarluni sakkortunerpaamik pineqaatissinneqartoq
Pinerluttuliornermi inatsimmi pillaatissat sakkortunersaannik taamaalilluni pineqaatissinneqarpoq, piffissamimi killiligaanngitsumik pineqaatissinneqarami. Taamaalillunilu inuiaqatigiinnut akuleruteqqissinnaasutut eqqartuussisup aalajangiinissaata tungaanut parnaarussaaqqassaaq.
Aammattaaq suliamut atatillugu aningaartuutigineqartut arnamullu pinngitsaalisinnarlugu allunaasamik qimeriaraluakkaminut taartisiassanik akiligassinneqarpoq. Arnaq 153.040 koruuninik taarsiiffigineqassaaq, BT-p ilangutassiisartua Birger Andersen KNR-imut taama oqarpoq.
Arnaq ullumikkut 39-nik ukioqartoq Østerbromi siorna aggustip 16-iani saassunneqarpoq. Nalunaaquttap akunneri qulingiluat qaangiummata atisaajarneqarsimalluni, nillorsimaqaluni tillernikitsuaraallunilu ilaqutaasunit nassaarineqarpoq. Arnaq arparujoortilluni muluallaaqqimmat ilaqutaasut akunnerpassuarni ujaarisimavaat. Angut kalaaleq akunnerit 24-t suli qaangiutinngitsut tigusarineqarpoq. Videokkut nakkutilliissutit arnallu oqarasuaataa angallattagaq angutip tillissimasaa iluaqutigalugit politiit tigusaraat.
Angut saassussinini pillugu pinerluttulerinermi inatsimmi pillaatissat sakkortunersaannik ullumi ataasinngornermi, Danmarkimi nalunaaqutaq malillugu ualisoq, pineqaatissinneqarpoq - immikkut paarisassanngortinneqarluni.
Angut 30-nik ukiulik immikkut navianaatilimmik pinngitsaaliisutut toqutseriaraluarsimasutullu pineqaatissinneqarnermi saniatigut, parnaarussivimmi paarsisumik oktobarip 20-ani saassussisimanini pillugu aamma pineqaatissinneqartoq, BT taama allaaserisaqarpoq.
Angut eqqartuussaanermini pinngitsuunerarpoq. Saassunneqarsimalluni nassuiaavoq, saassunneqarnerminilu qaqusupilussuanngornini pissutigalugu arnaq uppiffigisimanerarpaa taamaalillunilu nuakoorfigisimallugu. Taamatulli nassuiaateqarnera eqqartuusseqataasoqartillugu eqqartuussinermi upperineqanngilaq, nalilerneqarporlu angut ima ulorianaateqartigisoq immikkut paarisassanngortitaalluni pineqaatissinneqassasoq.
Eqqartuussinerup ingerlanerani aamma paasinarsivoq Nunatsinni sisamariarluni pineqaatissinneqartarsimasoq. Ilaatigut tillinniartarsimanini pissutigalugit, BT taama allappoq
