Pinngitsaaliisarnerit amerliartuinnavipput
Pinngitsaaliilluni arnerinerit anguserinerullu nunatsinni amerleriarujussuarsimapput, taama aviisi AG, politiit ukiumoortumik nalunaarusiaat 2006-imut tunngasoq misissoreerlugu allaaserinnippoq.
Kinguaassiuutitigut atornerluinerit, pinngitsaaliinerit siorna pingajorarterummik amerleriarput. Nunatsinni politiinut nalunaarutigineqartut ukiup siulianut naleqqiullugit 32 procentimik amerleriarsimapput, tassa 2005-mi 370-iugamik siorna 488-inngorsimagamik.
Politiit ukiumoortumik nalunaarusiaanni erserpoq, kinguaassiuutitigut atornerluinernut atatillugu suliassatut tigusatit sukkanerusumik suliarisarniarlugit pilersaarutigisaminnik politiit eqquutsitsisimanngitsut.
Pilersaarutigisimagaluarpaat suliat aallartinneqartut sisamaagaanga ilai pingasut – 75 procentit - sapaatip-akunnerisa pingasut ingerlaneranni naammassisarnissaat.
Assersuutissaavoq Paamiut, tassani sapaatip-akunnerini pingasuni naammassineqartut agguaqatigiisillugu 41 procentiinnaasarsimapput.
Politiit nalunaarusiornerminni aamma ikiaroornartumik pilerluuteqartunik ataqatigiissaagaanerusumik paasiniaanerusalernissamik anguniagartik angunngitsoorpaat.
Politiitut sulisut ilinniarteqqinnissaannut pisariaqartitsineq misissorneqartussaasimagaluarpoq soorluttaaq inatsisilerituut ilinniarteqqinnissaat pillugu misissuisoqartussaasimagaluarluni. Taakkuli tamarmik piviusunngortinngitsoorneqartut, AG-ip ilanngullugit allaaserai.
Politiit ilanngullugu nuannaarutigalugu nalunaarutigaat, ikiaroornartumik pinerluttulerinermi sulisut pikkorissartinneqarnerat siorna naammassineqartoq.
