Pinngitsaaliilluni kinguaassiutitigut atornerluisarnerit kingunerisinnaasaat Demokratit paasisutissiissutigerusuppaat
Ukioq 2010-mi inuit pinngitsaalineqarlutik kinguaassiutitigut atornerlunneqartut 159-iupput, siornalu 124-iusimallutik. Naak taamatut alianartumik pisarnerit ikileriarsimagaluartut inuit inoqatiminnik allamit pinngitsaalineqarlutik kinguaassiutitigut atornerlunneqarsimasut 124-ersuit ilaqutaallu kingunerluutaasussanik atugaqarnissaat naammaginanngerluinnarpoq.
- Taamatut inoqatiminnut ajortuliortut pineqaatissineqarsimasunut inissiivinnut igipajuinnarneqarsinnaanngillat. Taakkumi tarnip pissusaanik ilisimasalimik nakorsamilluunniit pinngitsaalineqarlutik katsorsarneqartariaqarput. Ajortuliortummi saniatigut ilaqutaasut aamma ikiorserneqartariaqarput. Ilaqutaasunimmi ataataasoq anaanaasorluunniit piffissami sivisuumi peqqarniitsumik ilaquttaminut pissusilersortarsimanera kingunerluuteqartarpoq, tamannalu uagut inuiaqatigiiusugut paasillugu ikiorsertariaqarpavut, Astrid Fleischer Rex taama oqarpoq, paragraf 37-ilu naapertorlugu apeqquteqarsinnaanini siuliani eqqartorneqartut pillugit sukumiisumik atorniarlugu ilimasaarutigalugu.
Pinngitsaaliillunili kinguaassiutitigut atornerluinerit atornerlueriaraluarnerilluunniit amerlasuut suli politiinut nalunaarutigineqarneq ajorput. Ajortuliorfigineqartullu misigisapalaatik inuunermi sinnerani tarnimikkut anniaatigisariaqalersarlugit. Ajortuliortummi oqaatigineqarsimanngikkaangamik uerillutik ajortulioqqeriaannaasarput. Tassa tamakku ajortulioqqinnginnerini maannangaaq aaqqiisoqartariaqarpoq.
- Pinngitsaalineqarlutimmi kinguaassiutitigut atornerlunneqarsimasut ilaatigut nakkaativittarput, ilaatigullu nipaarlunngortarlutik. Taamaammat taakku atornerlunneqarsimanertik oqaatigissallugu nukissaaruttarput, immaqaluunniit atornerluisumit taamatut pineqaqqinnissartik annilaagangiinnalersarlugu. Taamaammat ajornartorsiut taanna sukumiisumik sammisariaqarparput, pinngitsaalineqarlunilu kinguaassiutitigut atornerlunneqarsimaneq paquminartutut isigineqartarnera kipineqartariaqarpoq, ilami inuiaqatigiinnguuvugut ikittuinnaat. Taamaammat ukioq 2013-mi pinngitsaaliilluni kinguaassiutitigut atornerluisarnerup ukioritinneqarnissaa siunnersuutigissavara, Astrid Fleischer Rex knr.gl-imut taama oqarpoq.
