Pinngitsaaliilluni katsorsaanissaq orniginngilaat
2010-mi tuberkulosertut 114-t ukiut 30-t ingerlanerini aatsaat taama amerlatigisut Nunatsinni Nakorsaaneqarfimmit oqaatigineqarpoq.
Kisianni tuberkulosemik napparsimasup kaatsorsartikkiartornissaa periarfissaanngippat aatsaat pinngitsaaliilluni ageqqusisoqartassasoq, Niels Thomsenip paragraf 37 naapertorlugu apeqquteqaataanut naalakkersuisoq Agathe Fontain ilaatigut akivoq.
Niels Thomsenili isumaqarpoq allatut eqqarsartariaqarnermut killittoqarsimasoq. Pinngitsoorani qinnguartartittarnissaq aamma pinngitsoorani akiuussutissamik kapitittarnissaq pisariaqartut isumaqarami.
- Isumaqarpunga amerlanerussuteqartut kiffaanngissusaat tassani aamma eqqarsaatigineqartariaqartoq, tassa nappaat tuniluussinnaasoq eqqartoratsigu, taava pitsaasumik anigussagaanni isumaqarpunga massakkumut iliuuserineqarsimasuninngarninngaaniit allatut eqqarsarnissat killiffigisimallutigu, Niels Thomsen oqarpoq.
Peqqinnissamut naalakkersuisoq ilaatigut aamma akissummini allappoq,
Tuperkulosep akiorniarnissaanut periutsit sunniuteqarluarsinnaanerusut allat pillugit siunnersuummik tapersuillutik Naalakkersuisut akissumminni oqarput. Tamanna pillugu Niels Thomsen ima oqarpoq:
- Taanna uanga assorujussuaq pissangagivara toqqaannartumik massakkumut takusaqarsimasutut misiginnginnama, qanorpiaq taanna suleriusissaq imaqassanersoq.