Pinngitsaaliilluni arnereriaraluatoq tigummigallarneqarpoq
Angut 42-nik ukiulik Kangaamiuni niviarsiaqqamut 14-inik ukiulimmut pinngitsaaliilluni arnereriaraluarsimasutut pasineqarluni Maniitsup eqqartuussivianit sapaatip akunnerini pingasuni tigummigallagassanngortinneqarpoq.
Pisimasoq Maniitsumi politiinut apriilip ulluisa sisamaanni nalunaarutigineqarpoq. Pinngitsaaliilluni arnereriaraluarneq sapaatip akunnerata taassuma siuliani, tassa marsip naajartornerani, pisimavoq.
Pisimasoq pillugu politiit annertunerusumik oqaaseqarusunngillat, oqarlutilli takunnissimasut killisiorneqareersut.