Pinnersaasiat pillugit politikkeqalernissamik ujartuivoq

Ujaqqanik silisineq, soorlu pinnersaasiorneq inuussutissarsiutigineqarluarsinnaagaluartoq ingerlalluanngilaq, aaqqissuussaanerusumik politikkikkullu siunnerfeqarnerusumik ingerlatsisoqannginnera pissutigalugu. Qeqertarsuatsiaani ujaqqerivimmi ingerlatsisoq Hans Henrik Berthelsen isumaqarpoq.

- Qujanaqaaq silisivimmik pilersitsisoqarsimammat, kisianni ajoraluartumik ima isikkoqarpoq, ujaqqerivik pilerseriarlugu tassa – sinnera nammineq isumagissavarsi. Hans Henrik Berthelsen oqarpoq.

Qeqertarsuatsiaani innuttaasut tapertaralugu inuussutissarsiuteqarnissaat anguniarlugu, nunaqarfiullu eqqaa ujaqqanik erlinnartunik, soorlu rubininik peqarluarmat kommune silisivimmik siornaassuaq pilersitsivoq, atorluarneqartumik. Pinnersaasiornerlu peqassuseq piumaneqarneralu eqqarsaatigalugu inuussutissarsiutitut periarfissagissaaraluaqisoq Hans Henrik Berthelsen oqarpoq.

- Periarfissanik ulikkaaraluarpoq, qanorli atortorinnerusuugutta. Canadarmiut rubininik maanna piaapput, aalisakkerivipput allaat ujaqqerivinngortinneqarsinnaaneranik oqalukkaluarput. Hans Henrik Berthelsen oqarpoq.

Nunaqarfiit akilersinnaanerat pillugu qinikkat oqallisileruttorput, matumanilu inuussutissarsiutinik nutaanik pilersitsinissamik eqqarsarnermi ujaqqerineq pinnersaasiornerlu nunaqarfimmiunut periarfissaagaluartut Hans Henrik Berthelsen isumaqarpoq, qinikkalli siunissaq pillugu oqaloqatiginiarnerat ajornakusoortittarsimavaa.

- Politikkikkut qanoq eqqarsaateqartoqarnersoq nalunarpoq, tamanna pillugu naalakkersuisut siulittaasuat aamma oqaloqatigisimagaluarpara, annerusumilli paasisaqarfiginagu. Hans Henrik Berthelsen oqarpoq.

Qeqertarsuatsiaani ujaqqerivimmi ataatsikkut arfineq-pingasut silisisinnaapput.