Pinnerneqqusaatsitsineq tutsuiginanngitsoq
Tyrkiami pinnerneqqusaatsitsinissami oqallisaaqisumi Miss Civilizationimi kalaallimik peqataasoqassanngilaq. Tamannali aliasuutigissallugu pissutissaqarnersoq apeqqutaalerpoq. Tassami Tyrkiami pinnerneqqusaatsitsisarnerup suna siunertarineraa naluarput.
Peter Hadvardip Ekstra Bladep nittartagaanut nassuerutigaa, pinnerneqqusaatsitsinermi ajugaasumut akissarsiassaqanngitsoq. Aamma taassuma oqaatigaa nammineq aalajangiisussanut ilaalluni.
Danmarkimi niviarsissanik pinnersunik assiliisartut 2PM-ikkut oqaatigaat, niviarsissat assilisittartunngornissamik takorluugaqartut, unammisitsinernut taamaattunut peqataanissartik mianersuutigissagaat.
- Taamatut aaqqissuussinerit akerlerilluinnarpavut, tamakkununngalu peqataarusussinnaasut inertertarpavut. Niviarsissat tamakkununnga peqataanertik sumulluunniit atorsinnaanngilaat, Ekstra Bladep nittartagaanut taama oqarpoq 2PM-imik pilersitsisoq pisortaasorlu Peter Damgaard.
- Niviarsiarpassuit pitsaanngitsunik misigisaqarsimasut naammattoortarpavut. Assilisittartuussagaanni taava suliffeqarfiit tamakkuninnga suliallit attaveqarfigisariaqarput, taamaattunngornissamut periarfissaqarnerluni aperalugit, unammisitsinernut tutsuiginanngitsunut Tyrkiami ingerlanneqartutut ittunut peqataanatik, Peter Damgaard naggasiivoq.
