Piniutit pisoqarsuit Yellowknifemi nassaarineqarput
Piniutit ukiunik 2400-nik pisoqaassusillit itsarnisarsiuunit Yelloknifemeersunit kingullermik nassaarineqarput.
Piniarnermut atortut arlallit qaqqarsuarni taakkunani siornatigut nassaarineqartarput, itsarnisarsiuulli sapaatip-akunnerani uani nalunaarput qalugiusaq ukiut 2.400-it sinnerlugit pisoqaassusilik nassaarisimallugu, tamatumalu saniatigut pullat ukiut 1.000-it sinnerlugit pisoqaassusilik kiisalu pisissit qarsulu arlallit ukiunik 800-nik pisoqaassuseqassangatinneqartut.
- Soorlu tassa juullimi poortugarsiinnarluni, itsarnisarsiooq Tom Andrews Yellowknifemi ilisimatusarnermut qitiusoqarfimmeersoq oqaluttuarpoq.
Andrews aamma oqarpoq sermip aakkiartornerata alaatsinaannissaa pingaaruteqartoq, tassami atortut nassaarineqajaanngikkunik aserujasuararsuusarmata, taanna Canadami tusagassiorfimmut taama oqarpoq.
Ilisimatuut aammattaaq tuttut anakuinik tigusipput DNA atorlugu misissugassaminnik, taamalu misiligutissat imminnut sanilliunnerisigut tuttut ukiut 2.000-it matuma siornagut ingerlaartarfigisimasaat annertunerusumik paasisaqarfigisinnaallugit.
