Piniartuunermit aalisartuunermillu ilinniagaqarnermut ikaarsaariartinnissaat suliassat pingaarnerit ilagissavaat

apriilip 02-at 2007 17:23

Siunissami suliassat pingaarnerit ilagissavaat, inuit piniartuunermit aalisartuunermillu ilinniagaqarnermut inuussutissarsiutinullu nutaanut ikaarsaariartinnissaat.

Tamanna Naalakkersuisut anguniagaraat tamannalu aningaasaqarneq pillugu nalunaarusiami ilaatigut allaaserineqarpoq.

Taamaattorli marluutillugit immaqa ingerlanneqarsinnaassapput.

Tamanna SLiCA-mik taallugu issittumi inuuniarneq pillugu aatsaat taama sukumiitigisumik misissuisoqarnerata ersersippaa. Misissuinermi ilaatigut soqutiginartunik marlussunnik paasisaqartoqarpoq. Siullermik qangaaniilli ileqqutoqqat, soorlu piniarneq aalisarnerlu inuunermi naleqartitanut atugarissaarnermullu pingaaruteqartorujussuusut.

Aappassaanik ileqqutoqqat nutaaliaasumillu inooriaaseqarneq ingerlaqatigiissinnaasut paasineqarpoq. Tamanna soorlu Alaska-mi ingerlalluartoq, misissuinermik ingerlatsisut pisortaata Birger Poppelip oqaatigaa.

- Soorlu Alaskami ukiumut sapaatip akunneri arlallit sulinngiffeqarluni aalisariarlunilu piniariartoqarsinnaavoq. Nunatsinnili aalisariarlunilu piniariarsinnaaneq aningaasarsiornermut akornutaasutut isiginiarneqartarluni.

Alaskami aningaasarsiornikkut ingerlatsinermi inuit taamatut ingerlatsisinnaanerat innuttaasunit iluarisimaarneqarpoq.

Soorlu tamanit oqaatigineqartutut, pinngortitamut atassuteqarneq kinaassutsimut pingaarutilerujussuuvoq, kalaaliminertorsinnaaneq, aalisarnermit piniarnermillu pisanik kammalaatinut ilaquttanullu avitseqateqarsinnaaneq pingaaruteqarluinnarput. Taamatullu inooriaaseqarneq nutaaliaasumik inuuneqarnermut, tassa ilinniagaqarnermut suliffeqarnermullu akuliullugit ingerlanneqarsinnaapput, Birger Poppel oqarpoq.

Misissuinermi nunaqavissut 7000-it sinneqartut nunatsinneersut, Canadameersut, Alaskameersut Chukotka-meersullu peqataatinneqarput.