Piniartuunermi nutaaliortoqarpoq

- Avannaatungitsinni qimmeqarfiit qangali isumaqatigiissuteqarfigaagut puisit neqaannik nerukkaatissanik tunisaqarfigisinnaallugit, paasineqarmallu piumasoqarluartoq suliffeqarfillu ikioqatigiilluta taama pilersitsivugut.

Karl Lyberthip qujanarnerarpaa oqarlunilu taamaaliorneq sinerissami piniartoqarfinnut allanut aamma assut kaammattuutiginartoq.

Kalaaliminernik tunisassiornikkut nutaaliortoqarpoq, tassa Maniitsumi Great Greenlandip amminik tigooraaviutaa GLS A/S, amminik tigooraaginnarani puisinik ilivitsunik mattallillu neqaannik maannamiit tigooraalissaaq.

Maniitsumi piniartut amiinnarnik tunisisarunnaartussanngorput, puisittat ilivitsuutillugit tunisaalissammata. Tamannalu pivoq piffissami siusinnersukkut misileraalluni tunisassiortoqareerneratigut. Taama kalaaliminernik tunisassiornikkut nutaaliorneq Maniitsumi piniartut amminillu tigooqqaaviup GLS-ip suleqatigiillutik angusaraat. GLS-ip allaffissornikkut pisortaa Kim Lybereth oqarpoq tunisassiorneq manna naqqaniit misileraajutigaluni ingerlanneqassasoq sineriamullu siaruaanneqarnissaa siunissaq ungasinnerusoq eqqarsaatigalugu piukkunnaateqarsinnaasoq GLS-mi angusassat tunngavigalugit.

Karl Lybert Maniitsumi aalisartut piniartullu umiatsiaarasortut peqatigiiffiata siulittaasua oqarpoq taama tunisisinnaalerneq Maniitsup kommuneani piniartunut

assut iluaqutaasussanngortoq.

Maniitsumi GLS-ip allaffissornikkut pisortaa Kim Lyberth oqarpoq puisinik ilivitsunik tigooraanertik ataasinngorpat ammassasoq. Maniitsumi puisit amii 12.000-it siorna ameerutigineqarsimapput.