Piniartuuneq inuusuttunut kajuminnarnerusunngor- tinniarneqassaaq

Namminersornerullutik Oqartussani pisortaqarfiit assigiinngitsut piniarnermut piniartuunermullu attuumassutillit suleqatigiissitaliorput, suleqatigiissitallu siunissami piniartuunermut politikkissaq suliarissavaa, aappaagulu ukiup aallartilaarnerani naammassiniarneqassaaq.

Piniarnermik inuussutissarsiuteqarnermik misissueqqissaarnerup inerneri ullumi saqqummiunneqarmata, iliuusissanik amerlasoorpassuarnik tikkuussivoq.

Piniartuunerup ullumikkut ajornerpaaffianiittoq misissueqqissaareernerup inernerisa ilagaat.

Ukioqqortunerit kisimik piniartunngorsimapput, inuusuttullu piniartuusartut ikiliartulereersimapput, piniartuunerlu nutaamik inerisarneqangikkuni 2030-mi piniartuerutivissimassasoq eqqoriarneqarpoq.

Misissuinersuarmi paasisat assigiinngitsut namminersornerulluni oqartussani pisortaqarfiit kattullutik suleqatigiissitaliaat siunissami piniartutut inuussutissarsiornermi politikkissamik ilusiliissapput, suliarlu naammassinngikkaluartoq piniarnermut naalakkersuisoq Rasmus Frederiksen inuusuttut amerlasuut piniartunngornissaat sulissutiginiarpaa.

- Inuusuttut periarfissaat eqqumaffiginerulertariaqarpavut, Rasmus Frederiksen oqarpoq. Taanna aamma oqarpoq, uumasunik allanik pisassiisalernikkut periarfissarsiortoqartariaqartoq, taamaalilluni piniartuunerup kajuminnartunngortinneqarnissaa anguneqarsinnaammat. Piniartut amerlisinneqarnissaat aallaqqaammut ajornakusoorsinnaagaluartoq, anguniarneqassasoq, piniarnermut aalisarnermullu naalakkersuisoq Rasmus Frederiksen oqarpoq.

Piniarnermik inuussutissarsiuteqarnermik misissueqqissaarneq Roskilde-p ilisimatusarfiani atorfillip Rasmus Ole Rasmussenip allataraa saqqummiullugulu.

Rasmus Ole Rasmussen isumaqarpoq inuusuttut piniarnermik soqutigisaarukkiartornerat uissuumminartuusoq, attumaqataanillu nunatta aningaasarsiornerata ilaa piniartuneersuummat, piniartuuneq siunissami tammassappat, aningaasarsiortoqarunnaarluinnassasoq, inuussutissanillu avataanit eqqusuisoqarnerulissaasoq.

Misissueqqissaartut ilanngullugu naqissuserpaat nunatsinni piniarneq pillugu inatsisiliaasartut assigiinngitsut peqqutaallutik, piniarnermik aningaasarsiorneq ajorsilluinnartoq.