Piniartuuneq iluatinnarpoq

Piniartut ikiliartornerat iliuuseqarfigineqanngippat, ukiut qulit qaangiuppata piniartueruteriaannaasoq, piniartut atugarisaanik misissuisimasoq Roskilde Universitets Centerimeersoq Rasmus Ole Rasmussen oqarpoq.

- Piniartut atugarisaat maannakkut aaqqiivigneqanngippata, ukiut tallimat qulilluunniit qaangiuppata Kalaallit Nunaanni piniartueruteriaannaavoq. Piniartut atugarisaanik misissuisimasoq Rasmus Ole Rasmussen oqarpoq.

- Iliuuserineqarsinnaasutut taasinnaavara piniartunik atuartitsisalernissaq. Taamaaliortoqartalerpat piniartutut inuussutissarsiorsinnaaneq pitsaanerulersinnaammat.

Maniitsumi angallateerarsortut peqatigiiffianni siulittaasoq Karl Lyberth oqarpoq ilaqutariinnerup ikinngutigiinnerullu iluani piniartuuneq ilinniarneqartarmat piniartunik ilinniartitsisalernissap siunertaa takusinnaarpiannginnerarpaa. Maniitsumi kalaalimineerniarfiup nutarternerqarnerata kingorna, pisisartut amerlisimasut Karl Lyberth oqarpoq. Nillataartitsiviit arlallit pigineqalersimapput kalaalimineerniarfimmilu sulisut ilaat ATI-mi ilinniarsimasuullutik.

Maniitsumi umiatsiaararsortut eqqiluisaarnerusinnaaneq pillugu qanittukkut pikkorissartinneqassasut Karl Lyberth oqarpoq.

Kalaallit piniartuisa ataannarnissaat iluatinnaateqarluartoq, piniartut atugarisaanik misissuisimasoq Rasmus Ole Rasmussen oqarpoq,

- Neqit amerlasoorsuanngorlugit europami tunisassiarineqartartut piumaneerukaluttuinnarput. Neqit økologiskinik taaneqartartut, tassa neqit pinngortitameersut Europami piumaneqarneruleriartormata isumaqarpunga Kalaallit Nunaanni piniartut neqinik pitsaalluinnartunik pinngortitameersunillu pisaqartarneri atorluarlugit tunisassiornermik ineriartortitsivigilluarneqartariaqartut, Rasmus Ole Rasmussen oqarpoq.

Nalunaarusiaq KNAPK-mit utaqqineqangaatsiarsimasoq naammassineqarmat qujarutigineqarpoq. KNAPK-mit oqaatigineqarpoq nalunaarusiaq aallaavigalugu isumasioqatigiittoqarumaartoq.