Piniartutut inuuneq filmiliaraat

Taamatut filmiliornissaq Juaanna Platoup inooqatinilu ukioq ataaseq piniartutut inuunerminni isumassarsiaraa. Sooq taamaattumik filmiliornersut Juaanna Platoumut apeqqutigaarput.

- Filmi aqqaluaralu Kunuk Platou-lu suliaraarput ullumikkut piniartuuneq qanoq ittuunersoq takutinniarlugu. Taavalu ukiut 70-it matuma siornagut piniartutut inuuneq sanilliunniarlugu, filmilu taavarput ”Maaniippugut inuujumalluta”.

- Ullumikkut aamma ukiut 70-it matuma siornagut piniartutut inuuniarneq assigiinngissuteqarpat?

- Piniartut silarsuaanni piniartutut inoriaaseq suli taannaavoq. Filmimi sanilliuppavut arnat marluk taavalu angut, ukiut 70-it matuma siornagut inuusimasut.

Arnap aappaata ukiut 70-it matuma siornagut anaanaarutiaaramik inuuniarnertik qanoq issimasoq oqaluttuaraa. Ukiut 70-iinnaat qaangiukkaluartut ullumikkut isumaginninnermik aaqqissuussineq allarujussuuvoq, taamanikkummi inuuniarluni sorsuttariaqarsimavoq.

Filmimi piniartup angutip qimmit ukiut 70-it matuma siornagut qanoq perorsarneqartarnersut oqaluttuaraa.

Ilisimasat tamakkua ilaatigut tammannginnissaat anguniarlugu ilaatigut filmiliorpugut.

- Filmi kalaallinut takutinneqassaaq. Aamma panimma filmi tuluttut oqaasertalersorpaa, taamaalilluni Danmarkimi Italiamilu takutissinnaaniassagatsigu, Juaanna Platou oqarpoq.

Filmi ”Maaniippugut inuujumalluta” Ilulissani takuteqqaarneqareerpoq sapaatillu akunnerata naanerani Nuummi takutinneqassalluni.