Piniartutut allagartaliinnangajaat qilalugarniaqqusaalissappat
Nutartigaq 18:00
Sunngiffimminni pinialuttartunut qilalukkanik qaqortanik qernertanillu piniarsinnaanerup inerteqqutigilernissaa tusarliunneqarmat akerlerineqaqaaq, tamannalu tunngavigalugu Ane Hansen "aqiliallassimagunarpoq".
Kristian Jeremiassenip, Siumumeersup, tamanna naammaginngilluinnarpaa. Taanna isumaqarpoq, kikkulluunniit piniarsinnaatitaassasut, assigiinngisitsisoqarnerarpaalu. Paragraf 37 naapertorlugu apeqquteqaammini Naalakkersuisut nassuiaateqaqquai.
Piniarnermut naalakkersuisup, Ane Hansenip, akissutaani erserpoq, nalunaarutip 2004-meersup allanngortinneqarnissaa Naalakkersuisut kissaatigigaat, inuussutissarsiutigalugu piniartunut aningaasatigut tamanna iluaqutaassammat, pisiniarfinnimi pisiassat saniatigut taakku tassaalissammata qilalukkat neqaannik mattaannillu kisimik nioqquteqartartut.
Sunngiffimmili pinialuttartut aningaasaqarnerannut aamma sunniuteqassaaq, taamaammat inuussutissat akii pillugit KNAPK-p oqaloqatiginissaa pisariaqassasoq, akissummi allassimavoq.
Nalunaarummi maanna siunniunneqarpoq pisassiissutigineqartartut 0-miit 10 procentii sunngiffimmi piniartunut kommunimit tunniunneqarsinnaasut. Taamaalilluni pisassiissutigineqartut ilai inunnut sunngiffimmi piniarnermut allagartaqartunut tunniunneqassanersut, imaluunniit tunniunneqassannginnersut, kommunalbestyrelsimit aalajangiiffigineqassalluni.
Ane Hansenip ilisimatitsissutigaa TPAK, KANUKOKA, aamma illoqarfinni Qaanaami, Upernavimmi, Qeqertarsuup Tunuani Ilulissanilu aqutsiveqarfiit allannguutissaq akerlerigaat, kisianni KNAPK, Kommune Kujalleq aamma Kommuneqarfik Sermersooq allannguinissamik siunnersuummut tapersersuisut.
