Piniartut: Tuttut mianersortumik piniarneqarlik
Nunatta kitaa tuttoqarpallaarnerarlugu ukioq manna killilerneqanngitsumik tuttunniartoqarsinnaassasoq Pinngortitaleriffimmi biologit siunnersuutigaat.
Siunnersuut KNAPK-mit taperserneqaraluarluni tuttut mianersortumik pineqassasut innersuussutigineqarpoq.
Taamatuttaaq piniartut isumaqarput, 1990-ikkunnili killilersuisoqarnissamut akerliunerminni tusaaniarneqarsimannginnertik innersuussutigalugu. Maniitsumi aalisartut piniartullu peqatigiiffianni siulittaasoq Johannes Rosing taamatut isumaqartunut ilaavoq:
- Neriuppunga piniartut oqaasii toqqammavigineqartalissasut, uku biologit nungulersitsinersuarmik oqalullutik sakkortuumik killilersuisitsisarnerat tuttoqassutsimut ajornartorsiulersitsimmat, Maniitsumi aalisartut piniartullu peqatigiiffianni siulittaasoq Johannes Rosing, Uju, oqarpoq. Sisimiuni peqatigiiffiup siulittaasua Aqqalunnguaq Mikaelsen isumaqataavoq, killilersorneqanngitsumilli piniartoqassappat tunitsivissat aamma qulakkeerneqartariaqassasut Aqqalunnguup oqaatigaa:
- Aappaatigut tupaallannarpoq taama sakkortutigisumik ammaassivigineqassappata. Pissutsit ullumi imaapput tunitsivissatigut ajornartorsiortoqalersinnaassasoq, Sisimiuni aalisartut piniartullu peqatigiiffianni siulittaasoq Aqqalunnguaq Mikaelsen oqarpoq.
Upernaaq manna kisitsisoqarmat missingersuutit takutippaat, Maniitsup Sisimiullu kommuniini tuttut 90.000-it sinnilaaraat, Maniitsoq Nuullu kommuniini tuttut 36.000-it missaanniittut.
