- Piniartut siunissaat aalisarnermiippoq

Piniartutut inuussutissarsiorneq ullumikkut aningaasatigut naammaginartumik isertitsissutigineqarsinnaanngitsoq, ukiuunerani atorsaasumik sikuussaartoq, ukiuunerani imaatigut umiatsiaaqqamik iluamik angallaviunngitsoq, tamakkuupput Upernavimmi eqqaanilu piniarnermik inuussutissarsiutillit atugariligaat. Taama oqarpoq Upernavimmi Umiatsiaararsorlutik Piniartut Aalisartullu Peqatigiiffianni oqaaseqartartoq, piniartoq Lars Petersen.

- Decemberip 27-ni mitinnguanik pisaqarama taakkulu tunillugit, tassa ullumikkumut aningaasatigut isertitatuakka - naleqqussassagutta silaannaap allanngoriartornerani piniartutut inuussutissarsiornermiit aalisarnermut ikaarsaartariaqarpugut, Lars Petersen oqarpoq.

Lars Petersenip oqaluttuarpoq ullumikkut, ukiut siuliinut naleqqiullugu aningaasatigut isertitakinnerulerluni ukiut kingulliit silaannaap allanngoriartorneranik pissuteqartumik, tamannalu piniartutut inuussutissarsiornerup malunnaatilimmik ajorseriarneranik kinguneqartoq oqaatigalugu.

Taanna decemberip 27-nili miternik pisaminik tunisigami suli aningaasanik isertitaqaqqinngilaq, taamaattumillu isumaqarpoq piniartutut inuussutissarsiuteqarneq pissutsinut malinnaatillugu ineriartortinneqartariaqartoq.

Naalakkersuisut siulittaasuata Kuupik Kleistip, Inuit Ataqatigiinneersup, ukiortaami oqalugiaammini ilaatigut oqaatigaa, piniartutut inuussutissarsiuteqarnerup siunissaata nutaamik eqqarsaatigeqqinnissaa pingaaruteqarluinnartoq. Aamma oqaatigaa silaannaap allanngoriartorneranut Kalaallit Nunaat naammaginartumik naleqqussarsinnaasimanngitsoq, kiisalu pisortat ingerlataanniit naammaginartumik silaannaap sukkasuumik allanngoriartornera siumoortumik naleqqussarfigissallugu eqqoriarneqarsinnaasimanngitsoq.

- Silaannaap allanngoriartornera pissutigalugu piniartutut inuussutissarsiuteqarneq kipiluttunarsigaluttuinnarpoq. Uagut piniarnerinnarmik inuussutissarsiuuteqartuusugut pissutsinut naleqqussassagutta allatut ajornartumik aalisarnermut ikaarsaartariaqarpugut, tamannami orniginarnerpaajuvoq oorisiorfigissallugu, Lars Petersen oqarpoq.

Taamaakkaluartoq Lars Petersen isumaqarpoq piniartutut inuussutissarsiutilittut aningaasatigut isertitat aalisarnermut ikaarsaarnermi aallarniutigissallugit amigarluinnartut periarfissallu pitsaanerusariaqartut.

- Naalakkersuisuniit oqaasiinnartigut aninninneqartarpoq piniarnermik inuussutissarsiutillit tapersersorneqartut, kisiannili ajoraluartumik timitalerneqarneq ajorlutik, Lars Petersen oqarpoq.