Piniartut Qaanaarmiut narrapput
Qilalukkat qernertat avannaani pisassiissutigineqartut ilaannit, kujataani qilalugartassiisoqassasoq qularutigineqassanngitsoq, piniarnermut naalakkersuisoq Ane Hansen ullaaq KNR-imut oqarpoq.
Piniartulli Qaanaarmiut ukiumut pisassiissutit taama ikitsigitillugit ilanngarneqaqqinnginnissaat kissaatigigaat.
- Torrutiinnarlugu piniartullu apereqqaarnagit, Piniarnermut naalakkersuisoq aalajangiivoq, Kujataani qilalugartassat Avannaani qilagutassiissutigineqartuniit tiguneqassasut, tamanna piumasaarsorneruallaaqaaq, taama isumaqarpoq Qaanaami KNAPP-p siulittaasua, Mads Ole Kristiansen.
Mads Ole Kristiansen-ip pisassat ikilippata piniartut aningaasarsiornikkut atugaasa ajorseriarnissaat ernummatigaa.
- Avannaani pisassat ikilineqarpata, tamanna piniartut inuuniarnerannut attuisussaavoq, tassami ajornartoorfinni pisortanit ikiorneqartarneq naammaannartaqimmat, Mads Ole Kristiansen allappoq.
Taanna ilanngullugu allappoq aatsaat taama qilalukkanik takussaasoqatigimmat, pisassaareersut ilanngarnagit pisassat amerlineqarpata iluaqutaanerussasoq.
