Piniartut puisinniarsinnaanerat saqqummersitsinermi illersorneqarpoq

- Puisimik toqutsineq, puulukimik, nersussuarmik kukkukuumillu toqutsinermit ajornerunngilaq. Hollandimi illoqarfiit pingaarnersaanni Amsterdamimi saqqummersitsisarfimmi Mediamatic-imi saqqummersitsinissaq pillugu tusagassiuutinut nalunaarummi, ilaatigut taama allassimasoqarpoq.

Saqqummersitsisussat tassaapput assiliisartoq Anya Van Lit aamma atuakkiortoq Joost Bottema, Nunatsinni angalanerminni assilisaminnik, videuliaminnik apersuinerminnillu saqqummersitsiniartut. Saqqummersitsinissaq atserneqarpoq, Bardot Proviant Klub - kalaallisut taasinnaasarput 'Bardot-p qimatulivilinnut peqatigiiffia', matumani Frankrigimiu puisinik illersuinermi siuttuusoq, Brigitte Bardot, toqqaannanngikkaluamik pineqarpoq.

- Qanormi ippa uumasunut millionilikkaanut Europami ullut tamaasa toqorarneqartartut nerisassiaralugillu suliareqqinneqartartut? Kalaallit piniartut uumasut inersimasut, aallaammik aallaallugit piniartarpaat. Puisit piaraannik avaartaalluni piniartoqarneq ajortoq, tusagassiuutinut nalunaarummi ilaatigut allassimavoq.

Saqqummersitsineq januaarip 16-anni ammarneqassaaq, ilaatigullu mersornissamut, nerisassiornermik misiliinissamut kiisalu pisuusaarneq puisinniarnerlu pillugit oqalugiartoqassalluni.