Piniartut: Nuussuarmi tuttut ikiliartorput

Uummannap eqqaani Nuussuarmi tuttut ikiliartorput, ukioq naallugu kiisalu qamuteralaat atorlugit ukiukkut piniarneqartarnerat pissutaalluni. Taama oqarpoq Niaqornani piniartoq Hans Kruse. Taanna isumaqarpoq ukiukkut tuttuniartarneq unitsinneqartariaqartoq tuttut ikiliartussanngippata.
Allattoq Mads Lynge
oktobarip 15-at 2008 05:16

Aasakkut ukiukkullu ingasaallugu tuttunik piniarneq ingerlanneqarpoq Hans Kruse oqarpoq. Kulavaat ukiukkut piniarneqarnerusarput pualanerusaramik.

Uummannap Kommuniani piniartut qamuteralaat snescooterit atorlugit ukioq manna tuttunniarsinnaatitaapput, tuttullu qimarranerannut taakkua pisuutinneqarput, tuttut nujuartaammata, ikiliartornissaallu suli ilimanarnerusoq Hans Kruse oqarpoq.

Ukiukkut tuttunniarneq unitsinneqanngippat tuttut ikiliartornissaat ilimagineqarsinnaavoq, aasakkut tuttuniartarneq aggustip qaammataata aallaqqaataanit septembarip qaammataata naaneranut tuttuniartarneq atortinneqaleqqikkaluarpat tuttunut illersuutaalaarsinnaanissaa Hans Krusep naatsorsutigaa.

Tuttut 140-t Nuussuarmi siorna pisassiissutigineqarput, 150-illu pisarineqarlutik.

Tuttut 150-it siornaak 2006-imi pisassiissutigineqarput 73-illu pisarineqarlutik.

Pinngortitaleriffik Nuussuarmi tuttunik ukioq 2002-mi kisitsivoq, tuttullu taamanikkut 1164-iullutik.

Uummannami piniartut peqatigalugit kisitsisoqarnissaa siorna pilersaarutaasimagaluarpoq, silalli ajornera pissutaalluni kisitsisoqanngitsoorluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq