Piniartut naammattunik pilersuisinnaanerat qulakkeerneqarli
Aalisartut piniartullu aningaasarsiornerminni ajornartoortarnerat aaqqiiviginiarlugu ilinniartitseqqinnissamik annertussusileriikkanilluunniit ikiorserneqartarnissaannik partiit siunnersuutaat aaqqiissutissatut pitsaanerpaanngillat, aalisarnermik piniarnermillu ilisimatooq piniartullu inooriaasiannik aningaasaqarnerannillu ukioq kingulleq nalunaarusiortoq Rasmus Ole Rasmussen isumaqarpoq.
Piniartulli nunaminni naammattunik pilersuisinnaanerata, nunani allanisulli, qulakkeerneqarnissaa naalakkersuinermik suliaqartunit isumagineqarnerusariaqartoq, Rasmus Ole Rasmussen isumaqarpoq.
Nunani allani neqinik tunisassiornermi niuernerpalaarneq salliutinnagu kisiannili neqinik pilersuineq tunisassiornerlu inuiaqatigiinni pingaarnertut isigineqartarpoq. Taamaalilluni inuiaqatigiit neqinik pisiarisinnaasaat sinneqaraangata nunanut allanut tunisassiortoqarsinnaasarpoq. Piniartunullu tamanna illuanut saatissagutsigu piniartut neqinik tunisassiortunut unammillertariaqassapput. Tamannalu imaannaanngitsuussaaq piniartuulluni, Rasmus Ole Rasmussen oqarpoq.
Taanna aperaarput aalisartut piniartullu inuuniapiloortuuneri pissutigalugit tapiissutinik tunineqartariaqarnersut imaluunniit Demokraatit siunnersuutaatut ilinniarteqqittariaqarnersut imalu akivoq:
- Apeqqutigisatit pineqartumut attuumassuteqarput. Immitsinnulli apereqqaartariaqarpugut; piniartortagunuku qanoq kissaateqarfiginiarigut, qanoruna neqinik tunisassiornissaannut qulakkeerinninniartugut neqillu tunisassiarineqartussat pitsaassusaat qanorittoq tunisassiarerusupparput, Rasmus Ole Rasmussen taama akivoq.
Apereqqipparpullu kissaatigisagut naammassiniarlugit nunatta karsianit tapiissuteqartariaqarnersugut akivorlu:
- Aap, tamanna nunani allani takornartaanngilluinnarpoq. Assersuutigalugu Norgemi neqinik pilersuineq tunisassiornerlu eqqarsaatigalugu nunap immikkoortuini ingerlatsineq naalagaaffiup qularnaveeqqusertarpaa taamaalillunilu nunanut allanut tunisassiorsinnaaneq aamma aqqutissiunneqartarluni, Roskildep Universitets Centeriani lektori Rasmus Ole Rasmussen taama naggasiivoq.
