Piniartut juullimi oorissaqanngillat!

Savissivimmi piniartoq Magnus Eliassen ilaqutariinni pilersuisuuvoq taavani puiseqannginnerujussua peqqutaalluni amernik tunisassaqanngilaq, akiligassanilu kinguartittariaqassavai.

- Akilernissai kinguartilaarlugit immaqa kisianni, kaperlakkami tamanna taavalu siku nangiarnarluni suli iluamik issortinnginnami. Qaammammut isertitakka annertunngillat paasiniaannginnama nalugakkit puisit amii akikinnermut inuuniarutigineq ajornarsigamik taavalu sulaarikkut tamakku akitsornikuugamik, Magnus Eliassen oqarpoq.

Magnus Eliassen aqqaneq-marlunnik ukiulimmik ataatsimillu ukiulimmik nuliilu qitornaqarput illoqarlutillu.

- Juullikkunni neriuutigigaluarparput amigaateqarata inuussalluta tamaani, kisianni immaqa ajornakusuulaarpoq, ikumasinnaagutta kialaarutta immaqa ajorsinnaassanngilaq.

Savissivimmi nunaqarfiup aqutsisuisa siulittaasuat Qaarngaaq Nielsen oqarpoq, Qaanaap kommunianut ikiorserneqarnissaminnik piniartut qinnuteqartarsimagaluartut, akineqaannartarsimasulli siornaammat isertitaat amerlammata ikiorserneqarsinnaanngitsut.

Qaanaap borgmesteria Johanne H. Nielsen aperaarput, Qaanaap kommuniata tamanna qanoq iliuuseqarfigisinnaaneraa.

- Tassa imaappoq, soorunami inatsisit tunngavigalugit kinaluunniit pisinnaatitaavoq ikiorserneqarnissaminut qinnuteqassalluni taannalu aallaavigalugu ikiorsiisarpugut soorunami. Kisianni taakkua piniartunut tunngatillugu, ullumi aatsaat radio aviisimi taamatut tusagaqarpunga, taannalu maanga apuussimanngimmat akissuteqarfigiuminaatsittorujorujussuugakku, socialchefilu kommunaldirektørilu suliaqarlutik aallartipput. Kommunalbestyrelsemi ilaasortaqarami Savissivimmiumik nunaqarfimmi najuuttumik, taassuma aamma tusagaqarsimannginnera aamma aallaavigalugu taanna massakkut misissuisinneqarpoq, qanoq pisoqarnersoq taannalu akissuteqarniareeriarpat aammalu piniartut peqatigiit saaffiginnissuteqareerniareeriarpata suliniarneq aallartissaaq piaarnerpaamik, Johanne Nielsen oqarpoq.

Johanne H. Nielsen aamma oqarpoq, juullimut ullut qulingiluaannanngoraluartut Qaanaami aningaasaqarnermut ataatsimiititaliat sukkulluunniit aggersarneqarsinnaammata, ikiuinissartik juullimut angumeqqussinnaassasoq.