Piniartut inuiaqatigiinnut aningaasartuutaanngillat
Ilisimatooq Rasmus Ole Rasmussen, 2005-imi misissuinermik annertuumik igerlatsisimasoq taamatut oqarpoq. Misissuinerup takutippaa piniartut inuiaqatigiinnut 130 milliuuni koruuninik kaaviijaartitseqataasarput, pisartakkat aningaasanngorlugit nalunaarutigineqartanngitsut ilanngullugit.
Misissuinermi ilangunneqarput piniartut namminneq pisartagaat, ilaquttanut ikinngutinullu tunniunneqartartut aamma ilanngunneqarput.
Kalaalimineerniarfinni ilaat tuniniaasarput suliffeqarfinnullu assigiinngitsunut aamma tunisaqartarlutik. Aningaasaqarniarneq eqqartorneqartillugu tamakku ilanngutinngitsoorneqartarput, ataatsimullu kattukkaanni aningaasat ikigisassaanngitsut taamatut kaaviijaartinneqartarput. Illoqarfini taamatut aningaasanik kaaviijaartitsisarneq 70 milliuuni koruuninik naleqarpoq nunaqarfinnilu 60 milliuuni koruunit pallillugit piniartunit kaaviijaartinneqartarput. Aningaasallu tama amerlatigisut inuiaqatigiinni aningaasaqarniarneq eqqartortillugu puiugassaanngillat. Oqaatiginiarneqartarpoq illoqarfimmiut nunaqarfiimmiunik napatitsisut kisianni killormulluunnit pissutsit inissisimapput. Soorlu illoqarfinni ineqarnermut tapiiffigitittartut eqqarsaatigalugit nunaqarfimmiut tapiiffiginikinnerusarput. Isiginiarneqartarput piniartut nunaqarfinniittut soorlu amminut tapiissutinik pigaangata nunaqarfinnilu atorfissaqartinneqartut assartorneqarnerannut aningaasartuutaasartut eqqaaneqaraangata illoqarfimmiut akiliisorisaraluarput kisiannili pissutsit taamaanngitsut misissuinerup takutippaa, Rasmus Ole Rasmussen oqarpoq.
