Piniartut inatsisilerituumut saaffiginnipput

Piniartut peqatigiiffiata Qeqertarsuarni immikkoortortaqarfiata APPQ-p kommunip ikiorsiinissaminut arriisaarnerujussua inatsisitigut misissortillugu aallartippaa.

Peqatigiiffiup siulittaasuata Anders Petersenip ippassaq radio aviisimi oqaluttuaraa, silap ajoqattaarnerata kingunerisaanik sivisuumik piniariarsinnaasimannginnami qaammatip aallartinnerani Qeqertarsuup kommunianut ikiorserneqarnissaminik saaffiginnissimagaluarluni. Akissutisissagunili sapaatip-akunnerini marlunni utaqqissasoq ilisimatinneqarsimavoq.

Anders Petersen erseqqissaavoq Qeqertarsuup kommuniani kisimi taama atugaqannginnami, tassami piniartut arlaqartut aamma taama nalaataqarsimammata.

Taama kommunip arriisaarnerujussua maanna Qeqertarsuarni piniartut peqatigiiffiata inatsisitigut misissortinnialerpaa.

- Qaammatip affaanik utaqqisinneqarneq tamanna akuerineqarsinnaanngilaq, inatsisitigullu qanoq pineqarsinnaanersoq maanna misissortillugu aallartinnialerparput, Anders Petersen oqarpoq.

Ippassaq ilanngutassiami Qeqertarsuup kommuniani isumaginninnermik sulialik nassuiaavoq, sulisoq ataasiinnaq tamatuminnga suliaqartinneqartarmat sapaatip-akunnialuit utaqqisoqartariaqartartoq.

Anders Petersen ilaqutariinni pilersuisuuvoq marlunnillu qitornaqarluni, benzinasiutissaqaranilu patronisiutissaqannginnami ikiorserneqarnissaminik noqqaassuteqarsimagaluarpoq.

Taamatuttaaq Uummannami piniartut nuliaat umiatsiaararsorlutik aalisartut aammalu piniartut qinnuteqarfigisinnaasaannik fondtimik pilersitseqqammerput. Taannali aatsaat ukiut pingasut qaangiuppata tapiissuteqartitsisinnaalissaaq.

Kommunilli aamma taama ajornartuuinnermi tapiissuteqarnissaminnik pisussaaffeqaraluarput.

Inatsisartut peqqussutaat 1982-meersoq allassimavoq, piniartut silap ajornera pissutigalugu imaluunniit napparsimanertik pissutigalugu piniariarsinnaajunnaarpata nerisassarsiutissaannut, aammalu inimut kiassarnermullu akiliutissaannut ikiorserneqartassasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat