Piniartut inatsisartuni aqagu sammineqassapput
Nunatsinni piniartut atugaannut tunngasunik assigiinngitsunik imalinnik, Inatsisartuni ilaasortat partiinit assigiinngitsuneersut oqaluuserisassatut aalajangiiffissatullu siunnersuutaat arlallit, Inatsisartuni aqagu pingasunngornermi oqaluuserineqassapput, siunnersuutillu ilaat aatsaat qaqinneqalinngillat.
- Inuussutissarsiutigalugu piniartut aammalu inuussutissarsiutigalugu aalisartut ersarissumik immikkoortinneqarsinnaaqqullugit inatsisit naleqqussarneqassapput. Aammalu; Piniartut aalajangersimasumik aningaasarsiaqartinneqalerlik, puisit amiinik tunisinermi tapiissutit aningaasarsiassaannut atorneqartalerlik.
Taamatut nipilimmik, Inatsisartuni ilaasortaq attaviitsoq Esmar Bergstrøm siunnersuuteqarpoq, siunnersuutaalu Inatsisartuni aqagu oqaluuserineqassaaq.
Piniartut utoqqalillutik utoqqalinersiaqalersimasut piniarnermut allagartaqaannartalernissaannik Siumut Inatsisartuni ilaasortaatitaasa siunnersuutaat aqagu aamma oqaluuserineqassaaq.
Piniartut isertitamik 50 procentiat qaangerlugu allatigut isertitaqarsimagunik, allagartaarneqartarnerisa piaarnerpaamik atorunnaarsinneqarnissaa, taamalu piniartuunermik saniatigut isertitat apeqqutaatinnagit allatigut aningaasarsiorsinnaanissamut periarfissiuunneqarnissaannik, Siumumeersup Ruth Heilmannip siunnersuutaa aqagu aamma oqaluuserineqassaaq.
Takornariaqarnermit isertitaqarnerup piniartutut allagartaqarsinnaanermut mattussissutitut inissisimajunnaartinneqarnissaanik, Inuit Ataqatigiinneersup Ane Hansenip siunnersuutaa, Inatsisartuni aamma aqagu oqaluuserineqassaaq.
