Piniartut bonusisilerput

Nunatta Ammerivia Great Greenland ameerutit sinnerinik piniartunut 1.000-t missaanniittunut tapiissutinik juullertinnagu agguaalerpoq.
Allattoq Najaaraq Egede
decembarip 22-at 2008 10:48

Ammeriviup aamma Namminersornerullutik Oqartussat kiffartuusinermut isumaqatigiissutaannit sinneqartoorutit uani pineqarput.

Ukiup naaneranut atatillugu naatsorsuusiornermi takuneqarsinnaasimavoq, Nunatta Ammeriviata puisit amiinik pisiai pilersaarutaasumit ikinnerusimasut, aningaasallu sinneqartoorutaalersut piniartunut akiliutigineqartussanngorput.

- Naatsorsuuserisut naatsorsugaat naapertorlugit tunisinermi tapit 2,2 mio. koruuninik sinneqarmata, piniartunut bonusitut akiliutigineqassapput, pisortaq Henrik Estrup oqarpoq nangillunilu:

- Bonusisiassat piniartunut ukiup 2008-p ingerlanerani puisit amiinik qulinik sinnerlugilluunniit Nunatta Ammerivianut tunisisimasunut tunniunneqassapput. Piniartullu ataasiakkaat tunisaasa amerlassusaat toqqammaviussaaq, Estrup oqarpoq.

Piniartut bonusiassaat naatsorsorneqaleruttorput aningaasartaallu juullinnginnerani tunniunneqarumaartut oqaatigineqarpoq.

Nunatta Ammeriviata neriuutigaa taamaaliornermikkut sinerissami ilaqutariit 1.000-t missaanniittut juullisiornerat nuannernerulersikkumaarlugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq