Piniartut amerlanerujartuinnartut sillimmasertalerput
Aalisartut piniartut savaatillillu imminnut sulisuminnullu ajoqusernernut sillimmasernissamut soqutiginninnerat annertusiartorpoq.
Tamanna erserpoq Sulisilluni Ajoqusernerit pillugit Sullissivik kujataani paasisitsiniaalluni angalaneranit, sulisilluni ajoqusernernut sillimmasersinnaaneq tassani paasissutissiissutigineqarpoq.
Ataatsimoortunut sillimmaserneq aalisartut, piniartut savaatillillu kajumissutsiminnik ilaasortaaffigisinnaavaat, taamaattorli sulisitsisoq inatsit naapertorlugu sulisumi sulisillutik ajoqusersinnaanerisa sillimmasernissaat pisussaaffigalugu.
Ataatsimoortunut sillimmaserneq 2011-mili kajumissutsimik atuuttussanngorlugu aaqqissuussaavoq, Kalaallit Nunaanni atuuttussanngorlugu pilersinneqarluni, Kalaallit Nunaanni atugassarititaasut immikkut ittut tassani isiginiarneqarput, soorlu aalisartut piniartut savaatillillu sulineranni ajoqusernermi sillimmasersinnaaneq.
Ataatsimoortunut sillimmasernerup ilaa naalagaaffimmit tapiiffigineqartarpoq taannalu ukiumut 1.800 koruuninik akeqarluni.
- Aalisartut, piniartut savaatillillu sulisilluni ajoqusernernut sillimmasernissaminnut soqutiginninnerat assut tusarluarnarpoq. Inuussutissarsiutaat Kalaallit Nunaanni uloriarnarnerpaat ilagaat, taamaattumillu imminnut isumannaarnissaat uagut annertuumik anguniagaraarput, Sulisilluni Ajoqusernerit pillugit Sullissiviup pisortaa Kristina Nordby-Rachlitz oqarpoq.
