Piniartut akissarsiaqalerlik

Piniarnermi inuussutissarsiuteqartut qaammammusiaqartinneqarlutillu ilinniagaqarnikkut periarfissiuunneqarsinnaasariaqarput, taama isumaqarpoq Inatsisartuni attaviitsutut ilaasortaq Esmar Bergstrøm.

- Piniartorpassuit ingammik avinngarusimasuni najugallit sikusimanngeriartillugu piniarsinnaajunnaartarput, taamaaligaangamik aningaasaqarnermikkut ajornartorsiulertarput amerlasuullu inunnik isumaginnittoqarfimmiit ikiorneqalersarput.

Qimmitik nerisassaqartissinnaaneq ajorpaat, ilaasa piniutitik tunisarpaat ilaasalu qimmitik toquttariaqartarlugit.

Allatut periuseqartariaqarpugut taamaattumillu siunnersuutigaara puisit amiinut aningaasat atorneqartussaagaluit piniartunut qaammammusiaritinneqarsinnaasut taamaalillutik aalajangersimasumik qaammammut isertitaqalersinnaaleqqullugit, taama oqarpoq Savalimmiormiuusoq Esmar Bergstrøm.

Taanna aperaarput piniartut ilinniagaqarnikkut periarfissiuunneqarsinnaanerat siunnersuutaasa ilagigaat, taannalu qanorpiaq paasisassaanersoq.

- Takornariartitsisartutut outfitterinik taaneqartartutut takornarianilluunniit angallassisartutut piniartut ilinniarsinnaanerat periarfissiuunneqarsinnaavoq aammalumi nunaqarfinni teknikeritut ilinniartitsisoqarsinnaavoq taamaaliornikkut qalipaasutut saffiuutut motorilerisutut ikuallaavilerisutulluunniit pikkorissartitsinerit ingerlanneqarsinnaammata. Taamaalillutik inuutissarsiuutinut allanut periarfissat ammaanneqarsinnaammata, Esmar Bergstrøm oqarpoq.

Esmar Bergstrømip siunnersuutaa Inuit Ataqatigiinnit taperserneqarallartillugu Aalisarnermut, Piniarnermut Nunalerinermullu ataatsimiititaliamut ingerlateqqittussanngortinneqarpoq.