Piniartut akeqqatik naapissavaat
Puisinniartarneq aamma arfanniartarneq nungusaataanngitsumik piniarnerunersoq imaluunniit asuli toqoraanerunersoq ammasumik oqaluuseriumallugit, Atlantikup Avannaani Suleqatigiit oqallitsitsiniarput. Piniartut Atlantikullu Avannaani aalajangersaasartut illuatungaanilu uumasunik avatangiisinillu illersuiniaqatigiit ataatsimeeqataassapput.
Ataatsimeeqatigiinnissami Brigitte Bardot mattaangasoq peqataanavianngikkaluarpoq, kisianni ilaatigut ataatsimeeqataassapput Ane Hansen, Aqqaluk Lynge aamma Leif Fontaine. illuatungaanniissallutillu Gitte Seeberg WWF-imeersoq, Mads Flarup Christensen Greenpeacemeersoq aamma Christian H. Hansen Danmarkimi partiimit Fokus-imeersoq.
Illuatungeriit tusagassiorfitsigut ukiorpassuarni isummaminnik illersuillutik akerleriittarsimasut, imminnut toqqarlutik oqaloqatigiinnissaat anguniarneqarpoq.
"Immikkuualuttut pineqalerpata ammaassisoqarlunilu paaseqatigiittoqarsinnaanersoq imaluunniit isummat ima akerleriitsiginersut allaat oqaloqatigiittoqarsinnaanani ataatsimeeqatigiinnikkut paaserusunneqarpoq", qaaqqusissummi taama allassimavoq.
