Piniartut aalisartullu aningaasaateqarfeqalerput
Uummannami umiatsiaararsorlutik aalisartut piniartullu nuliaat aningaasaateqarfiliorput uitik ikiorniarlugit. Aningaasanik katersineq Uummannami upernaarli aallartittoq nuna tamakkerlugu maanna ingerlanneqarpoq. Aningaasaateqarfiup siulittaasua Margrethe Nielsen oqarpoq Aningaasaateqarfimmut nunami tamarmi umiatsiaararsorluni aalisartut piniartullu maanna aamma qinnuteqarsinnaanngortut. Kisianni sooruna aalisartut piniartullu inuussutissarsiornermikkut ajornartorsiornertik pissutigalugu namminneerlutik aningaasaateqarfiliorsinnaasimanngitsut? Margrethe Nielsen ima akissuteqarpoq:
- Tassa naluneqanngitsutut angutitagut nipaatsuupput ajornartorsiutiminnillu nilliaatiginnittuunatik, taamaattumik uanga inuunera aallavigalugu nipangersimaannarusunnaga taamatut aallartitsisimavunga ukioq februaarip naalernerani.
Margrethe Nielsen oqarpoq silap unerisimannginnerujussua taama aallartitsinerminut peqqutaaqataasoq.
- Silarlunnersuata nalaani siorna septembarimiit ukioq februaari tikillugu uiga isertitaqannginnami uannut assut ilungersunarsimavoq, akiligassat takkuttaramik aalajangersimasuullutillu, assut ilungersunartarpoq kisimiilluni taama pilersuiniartarneq.
Margrethe Nielsenip aningaasaqarfimmik aallartitsinissi eqqarsaatigileramiuk aamma ilanngullugu eqqarsaatigisimavaa piniartutut inuuniuteqarnermi atugarissaartuaannannginneq ingammik silap allanngorajussinera eqqarsaatigissagaanni. Tamanna pillugu KNR Avannaanut saaffiginnissimavoq aallakaatitassiarineqarlunilu.
- Aallakaatinneqareersorlu sinerissaminngaanniit assut sianertaarfigineqarpunga, assullu tamanna qujanarpoq paasigakku tapersersorneqarlunga, taamaalillungalu sulinera ingerlatiinnarpara.
Piniartut aalisartullu umiatsianik angallatillit piniarsinnaajunnaarunik imaaliallaannaq aningaasanik sulinnginnersiutissanik pissarsisinnaasanngillat, tamannalu aningaasateqarfiliornermut aamma peqqutaaqataasoq Margrethe Nielsen oqarpoq.
- Piniartut ullut arlerlugit isertitaqanngikkaluarunik uatsitulli sulisartutut soorlu napparsimanersiuteqanngillat ajunngitsorsiassaqartaratillu. Uagut sulisartuusugut napparsimatilluta napparsimanersiutisiaqartarpugut, aalisartulli piniartullu taama inuusinnaannginnerat aallaavigalugu taama aallartitsivunga, Margrethe Nielsen erseqqissaavoq.
Umiatsiaararsorlutik aalisartut piniartullu nuliaasa aningaasaateqarfiani siulittaasoq Margrethe Nielsen aamma oqarpoq aningaasaaterfimmut aningaasanik katersuiniussinermi Grønlandsbanke aqqutigalugu konto-mik aammaasoqareersoq, aningaasaliinissamullu piumasut kikkut tamarmik ikisisinnaasut, kontomut uunga:
6471 3000 300. Aningaasaateqarfimmut katersuiniaqqaartoqartussaammmat qinnuteqartoqarsinnaalissaaq ukiut pingasut qaangiuppata.
