Piniartut 71-t ikiorserneqarput
Nunatsinni inuit 71-t pinngortitap allanngorneratigut inuussutissarsiornermikkut ajornartorsiulersut Namminersornerullutik Oqartussanit katillugit milliuuni koruunit affaasa missaannik ikiorserneqarsimapput.
Ikiorsiisarneq siornali atuutilermat 413-nit qinnuteqarsimapput, taakkunannga 71-t ikiorserneqarlutik.
Ikiorserneqartut ilaat 47-it Qaanaarmiuupput, qimmit nerisassaannut atugassaannik immikkut tamarmik 5000 koruuninik tunineqartut.
Uummannami ukiaq anorersuaqattaarneratigut taavani piniartut piniutaarsersimasut qulit aamma ikiorserneqarput.
- Piniarunnaavissimanissaq imaluunniit pinialeqqinnissamut tunngaavissaarutivissimanissaq qinnuteqarnissamut tunngaviuvoq, Niels Fensbo, Piniarnermut Pisortaqarfimmi allaffimmi pisortaq oqarpoq, oqarporlu amerlasuut isertitaminnut ilassutissanik piniutinulluunniit iluarsaanissamut atugassanik qinnuteqarsimasut itigartinneqarsimasut, ikiorsiisarneq pineqartoq tamakkununnga atuutinngimmat.
