Piniartunut annertussusileriikkamik ikiorsiisalernissaq anguniarneqarpoq
Nunatsinni piniartut aalisartullu umiatsiaararsortut isertitaarukkallarnerminni sulinermik inuussutissarsiuteqartutulli annertussusileriikkamik ikiorserneqartalersinnaanissaat aqqutissiuunneqartariaqarpoq, taama Inatsisartuni ilaasortaq IA-meersoq Ane Hansen, Inatsisartut ukiuunerani ataatsimiinnissaannut oqaluuserisassatut siunnersuuteqarpoq. Ane Hansen ima tunngavilersorpoq:
- Misissuinerit arlallit takutinnikuuaat aalisartut piniartullu umiatsiaararsortut nunatsinni aningaasarsiakinnerpaarpaanut ilaasut. Siunissarlu eqqarsaatigalugu piniarteqarnissarput pisariaqartittuartussaangatsigu ineriartillugulu, pisariaqartutut isigisimavara piniartut aalisartullu umiatsiaararsortut aningaasarsiorsinnaajunnaarallarnerminni arlaatigut illersorteqarnissaat.
Pisortat annertussusileriikkamik ikiorsiissutaat sulinermik inuussutissarsiuteqartunuinnaq atuuppoq, taassumali saniatigut pisortanik ikiorserneqarnissamut nunatsinni innutaaasut piniartut aalisartullu ilanngullutik qinnuteqarsinnaatitaapput. Peqqussulli tamanna naammanngitsoq Ane Hansen tikkuaavoq.
- Naammanngilaq, peqqussut taanna tunngavigalugu ikiorsiissutinik piniaraanni ilaqutariit tamavimmik isertitaqanngitsuusariaqaramik. Siunnersuuteqarnertinni eqqartorpavut ilaqutariit piniartortallit, taakku piniartortaat silamik imaluunniit aalatigut ajutoorneq pissutigalugu pissarsiuisinnaajunnaaraangamik annertussusileriikkamik ikiorsiissutinik pisinnaanngillat inatsimmik taamaattumik soqannginnatta.
Ukiuni kingulliunersuni silaannap allanngoriartorneratigut silap unerisimajunnaariartornera siunnersuuteqarnerminut tunngavioqataasut Ane Hansen oqarpoq.
-Silaannaap allanngoriartornera piniartunut annertoorujussuarmik kingunerluttarsimavoq. Pisartut ingammik avannaaniunerusoq pisartut eqqarsaatigalugit pisariaqarsorilersimavarput inatsimmik taamaattumik pilersitseqqulluta siunnersuuteqarnissarput.
Ane Hansen-ip siunnersuutaanut assingusumik Inatsisartuni ilaasortaq Kattusseqatigiit Partiaaneersoq Anthon Frederiksen aamma siunnersuuteqarpoq. Aalisartut piniartullu annertussusileriikkamik pisinnaanngitsut pisalernissaannik naalakkersuisut suliniuteqarnissaannut Inatsisartut aalajangiissuteqassasut, Anthon Frederiksenip siunnersuutigaa. Siunnersuutigineqartut Inatsisartut ukiuunerani ataatsimiinnissaanni februaarip 15-ianniit ingerlanneqartussami oqaluuserineqartussanut ilaapput.
