Piniartorsuusimasoq Nersornaatisivoq

Inatsisartut Siulittaasuata Josef Motzfeldtip Hotel Kap Farvelimi pingasunngormat oqalugiaataa imaappoq:

Asasara Abel Silassen

Nersornaammik sølviusumik nersornaaserneqarnerpit maani Nanortalimmi nalliuttorsiutigineranut qaaqqusatillu tikilluaqqusinnaagassi assut nuannaarutigaara. Abel Silassen piorsarsimassutsimut tunngasumik ukiorpassuarni tunniusimallutit sulisimanerit pissutigalugu nersorniarneqarputit.

Piffissami sivisuumi piorsarsimassutsimut tunngasunik annertuumik nersortarialimmillu suliaqarsimanerit tunngavigalugu Inatsisartut Siulittaasoqarfiata Nersornaammik sølviusumik nersornaaserpaatit.

Tunniusimallutik akuuffigisimasatit amerlaqaat, maannalu tamaasa taagornissaat annertuallaassaaq. Nalunngilarpulli 14-inik ukioqarlutit qajartaaqqaartutit paasisakkalu malillugit 1944-mi piniartorsuartut Kommunerådimit allagartartaartinneqarputit, taamanilu 19-iinnarnik ukioqarputit. Tamatuma kingorna umiartortutut ilinniarputit 1953-imiillu 1994-imut umiarsuarmi naalagaavutit, ukiuni siullerni 20-ini taamani Kongelige grønlandske Handeliusumi tamatumalu kingorna ukiuni 21-ini peqqinnissaqarfimmi. Peqatigiiffiit arlallit aallarneeqataaffigisimavatit, taakkununnga ilaapput angallatit naalagaasa peqatigiiffiat 1965-imi, Nanortalimmi Katersortarfiutileqatigiit aammalu Brugsen Nanortalik. Tamatuma saniatigut Nanortalimmi Kommunalbestyrelsimut 1967-imit 1972-imut ilaasortaasimavutit ilagiillu sinniisaannut 1977-imit 1998-imut ilaasortaasimallutit.

Abel Silassen, Nersornaat sølviusoq maanna Namminersorlutik Oqartussat sinnerlugit tunniutiligara illinnut qujaniarnermut ersiutaagili.

Uummammit pisumit pilluarit.