Piniartoq: Qimmit perlerlutik qilallutillu toqusarput
Qimmit qulit sinnerlugit aasakkut naalliullutik perlerlutik toqorartut Kullorsuarmi aasat tamaasa takussaajuartarput, - taama Kullorsuarmi piniartut ilaat qimminik paarsisinnaanngitsunik unnerluutiginnittoqarnera taperserlugu oqarpoq.
Piniartut qimmiminnik paarsisinnaannginnerarlugit Ilulissani uumasut nakorsaata piniartunik unnerluutiginninnera ullaaq Radioaviisimi tusarliupparput. Tamatumunnga Kullorsuarmi piniartoq Ole Eliassen tapersiivoq:
- Kullorsuarmi qimmit paarinerlutat aamma maani takussaapput, pingaartumik aasakkut. Qimmit ilaat nerisinneqaratillu imertinneqarneq ajorput, ilaallumi toqusarput, nuannerpallaarnerlu ajorpoq qimmit qimmeqatitik toqungasut nerigaat takullugit, piniartoq Ole Eliassen oqarpoq.
Aamma oqarpoq neriuutigigini qimmit naalliuttut isiginnaaginnarneqartarnerat kommunefoged-mit qimussertartullu peqatigiiffianit iliuuseqarfiginiarneqartariaqartoq.
