Piniartoq Narsaq Kujalliup eqqaani ujaarineqartoq
21-nik ukiulik Avalequt Gunnar Jakobsen, Narsaq Kujallermit kisimiilluni tallimanngormat januaarip ulluisa aqqaneq-aappaanni aqisserniarsimavoq.
Tungujortumik kavaajaqarpoq, tungujortunillu qarleqarluni teqqialimmillu nasaqarluni. Timmiarsiut nassarlugu aallarsimavoq.
Kangimut Niaqornat tungaannut ingerlasimasaoq nalunaarutigineqarpoq. Nunaqarfimmi innuttaasut arlallit ujaasiartorsimapput, iluatsinngitsumilli. Ilaqutaasut Avalequt Gunnar Jakobsen maqaasineqartutut kingorna taava kalerriutigaat.
Issittumi Sakkutooqarfik suleqatigalugit politiit Narsaq Kujalliup nalaani ujaasipput, qulimiguulik Sakkutooqarfiullu timmisartua Challengeri ujaaseqataallutik.
Tamaani ataasinngormat anorlernera pissutaalluni timmisartoq qulimiguulillu atorlugit ujaasisoqarsinnaasimanngilaq. Qulimiguulilli ippassaq ullumilu ujaasitinneqarsinnaasimavoq.
Inuit Avalequt Jakobsenimik takunnissimasinnaasut allatigulluunniit attaveqarsimasut politiinut saaffiginneqquneqarput. Politiit oqarasuaataasa normoraat 70 14 48.
