Piniartoq ikioqqugaluartoq utaqqisinneqarpoq

Piniartut aalisartullu peqquteqarlutik pilersuisinnaajunnaarallartut ikiorserneqarsinissamut periarfissaqartut Inatsisartut peqqussuteqarput. Inuuniarnikkullu ajornartuuiffimmi piaartumik ikiorsiisoqartarnissaq pingaaruteqartoq kommuneqarfiit kattuffiannit ippassaq erseqqissaatigineqarpoq. Qeqertarsuarmi piniartut ilaat Anders Petersen inuussutissarsiornikkut ajornartuuikkami kommunemut saaffiginnikkaluarpoq ikiorserneqarnissamik. Ikiorserneqassaguni qaammatip affaani utaqqeqqaartariaqartoq kommunemit ilisimatinneqarsimavoq. Anders Petersen ima oqaluttuarpoq:

- Qaammatip aallartilaarnerani kommunemut saaffiginippunga ajornartoorama piffissamik inniminniiniarlunga, inniminniigama 17-iani piffissamik tunineqaraluarpunga, qaammatip affaa utaqqeqqaartariaqarlunga. Pilersugaqarlungalu qaammatip affaa utaqqiinnarsinnaannginnama isumaginnittoqarfimmut toqqaannartumik saaffiginnikkaluarpunga, oqarfigineqarlungali suliassanik tulleriiaarineq pissutigalugu allat tulleriiarneqarsimasut siulliuteqqaarneqartariaqarmata utaqqisariaqassasunga.

Andres Petersen saaffiginnikkami toqqaannartumik oqarsimanngilaq piaartumik ikiorserneqartariaqarluni kisianni ajornartuuikkami saaffiginnissimanerarpoq.

Piaartumik ikiorserneqannginnera pilersuiniarneranut kinguneqarpoq:

- massakkut aallarsinnaanngilanga sila ajuinnavimmat, aamma benzinasiutissaqanngilanga imassarsiutissaqarnangalu, kisianni pisereernikuullungalu silaqqisseriarpat aallariaannaavunga. Akiligassalli takkuttut inuussutissaqarnissarpullu peqqutigalugit ikiorserneqarnissamik tassa saaffiginnikkaluarpunga.

Piniartut massakkut atukkamikkut arlaatigut pitsanngoriaateqartinneqassappata sutigut pitsanngoriaateqartoqartariaqarsorisaqarnersoq Anders Petersen aperaarput imalu akivoq:

-Sionatigulli ujartorneqartarsimagaluarpoq pilersuisinnaannginnerup nalaanni inuttut allatulli pisinnaatitaaffeqarnissarput tamannalu KNAPK- ip ataatsimeersuarnerani aamma qaqinneqartarsimagaluarpoq, soorlu ajornartoornermi inuttulluunnit ajoqusersimagaanni allatuli ikiorserneqartarsinnaanissaq.

Qeqertarsuarmi piniartut ilaat Anders Petsren taama oqarpoq. Qeqertarsuup Kommuneani inunnik isumaginninnermut pisortaagallartoq Gerda Broberg Heilmann oqarpoq saaffiginnissutinik kommunemi inuk ataasiinnaq kisimi suliaqartitaasoq, tamannalu pillugu saaffiginnittut akissutisinissaminnut sapaatip akunneri arlerlugit utaqqisariaqartartut.

Qeqertarsuup kommuneani kommunaldirektøri Ove Berthelsen, massakkut Danmarkimiittoq pineqartoq pillugu sukumiinerusumik paasisaqartigani annertunerusumik aamma oqaaseqarsinnaanngikkallarnerarpoq.