Aarlunnit sisamanngormat aallaaneqartunit sisamanit ataaseq.Assi: Karl-Anders Skifte

Piniartoq aarlummik perngartoq: Mamaq aqik

Aarluit sisamat puisinik aalisakkanillu piniarnermut akornusersuutaanerat pissutigalugu sisamanngormat pisarineqartut, piniartut ilaat oqarpoq.

Aarluit sisamat sapaatip akunnerata siuliani Nuup kangerluaniilerput. Taakkulu piniartunit eqimattanit sisamanngormat pisarineqarput.

Karl-Anders Skifte piniartut ilagaat, taassuma pisani nuannaarutigalugulu tulluusimaarutigaa.

- Piniarlugit pissanganartorujussuuvoq, pingaartumik qaqutiguinnaq Nuummukartarmata.

Aarluit illoqarfiit pingaarnersaanni alutorsaatigineqarput, takornarialerisullu inuit uumasunik qanimut takunnissinnaanissaannut ”aarlunnik takornariarnissamut angalanissanik” pilersaarusiupallapput.

Takornarialerisullu ugguutigeqisaannik taakku maanna pisarineqareerput.

Aarluillu aallaaneqarnissaat Nuummi aalisartunut piniartunullu pingaaruteqarpoq, taamaaliunngikkunimmi puisit qimaasinneqanngikkunik nerineqassasut, Karl-Anders Skifte oqarpoq.

- Tusartareerparput sinerissami aarlunikkaangat piniagassat tammakartarnerat, maani aamma taamaappoq, sivisulaartumik pulaqqanikuupput kangerlummi. Taava kangerlupput puisimilluunniit takuneq ajorpugut ilummut aqqutaani, aatsaat sikut sinaani puisinittarpoq.

Karl-Anders Skiftellumi piniartullu aarluk uulligamikku puisip innaap ilaa aarluup aqajaruani nassaaraat.

 

 

Piniartup takornarialerisut aarluit toqungasut pillugit uggorinnittut uggorinneqatigivallaanngilai.

- Uagut inuussutissarsiuteqartut eqqarsaatigigalugu nunaqavissuuvugut piniartut, ataqqineqarnerusariaqaraluarpugut takornarialerisuninngaanniit, Karl-Anders Skifte oqaroq.

- Puiserpassuit nungussimassagaluarput, pisarinngitsoorsimasuugutsigit.

Aarluit pisarineqarnerat inoqutinut attaveqaatitigut aamma arlalinnit oqaaseqarfigineqarpoq. Tassanilu aarlunnit toqunneqartunit sisamanit pingasut kivisimanerat arlallit uggoraat.

Karl-Anders Skiftep aarluit pingasut kivisinnissaat siunertaanngikkaluartoq nassuiaatigaa.

- Isumaqartoqarpoq piniarluta piaaraluta kivisoortikkigut, taamaanngilaq. Arlaliulluta piniaqataavugut, ajoraluartumillu pingasut kivisoorput.

Karl-Anders Skiftep piniartullu allat aarluk pisarineqartoq Wildfood.gl-ikkut tassa piniartut pisaannik nittartakkatigut nioqquteqartarfikkut maanna tuniniarpaat.

Aarluup neqaa mattaalu kiilumut 50 koruuneqarpoq.

Karl-Anders Skiftep aarluup mattaa nammineq usserpaa.

- Mattaa misilereerpara, mamaq aqik, arlaannut assersuutiginngilara.

Aarluup neqaa mattaalu kviksølvimik avatangiisinullu toqunartumik PCB-imik akoqangaatsiarsinnaammat nerineqarnissaa navianarsinnaasoq, Pinngortitaleriffiup oqaatigaa.

Tamanna Tunumi aarlunnik misissuinerup takutippaa, tassangalu aarluit inunnit nerineqarnissaat innersuussutigineqanngilaq. Pinngortitaleriffiup nunatta kitaani aarluit aamma mingutsitsiffiungaatsiarsimasinnaasorai.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl