Piniartoq 1.000 koruuninik annaasaqassaaq

Ikummatissat akiisa ingerlaannartumik liiterimut 50 øremik ippassaq qaffanerat piniartutut inuussutissarsiutilimmut qaammammut minnerpaamik 1.000 koruuninik annaasaqaataassaaq.

Upernaviup kommuneani Kullorsuarmi sikuutillugu qaleralinniatut aasaaneranilu piniartutut inuussutissarsiutilimmut akitsuineq artornarsereerpoq. Puisip amiata akia tankip ulikkaarnissaanulluunniit naammagunnaarpoq. Ullut tamaasa 75 liiterimut orsertarniaruni 320,25 koruuneertassaaq, puisip amialu ataaseq 300 koruuni inorlugu akeqarpoq, Qitdlaq Qaerngâq ima oqarpoq.

- Puiseqartillugu aallakulasarpugut, qimmeqaratta inuuniarattalu taamaattariaqarpugut, oqarpoq.

Qitdlaq Qaerngâp aallassatilluni 75 liiterimik orsussarsisariaqartarpoq: Puisinniarfimminut 25 liiterit, puisinniarfimminni 25 liiterit angerlamullu uternermut 25 liiterit. Ullut tamaasa.

Taamaalilluni orsussamut qaammammut maanna akilernerusalerpai 1.000 koruunit sinnerlugit.

- Allatut ajornartumik aallarnerusariaqalissaagut, inuuniarnermut oqimaalaassaaq.

25 liiteriinnarmut 100 koruuni angumaleramiuk.

- 1.000 koruuni qaammammut akiliinerusalissaagut, 2.000 koruuninillu pisiniarniaraangatta qaqisaratsigit.

Ooriuteqaleraangatta meeqqagut soorunami eqqarsaatigisaratsigut mamakujunnguanik naatitanik pisiartarpugut.

- Puisip amia ataaseq 300 koruuneqanngilarluunniit, taakku amigapajaalerput. 75 liiterimi 300 koruunit sinneqarami.

Qitdlaq Qaerngâq Q-17-imik umiatsiaqarpoq 60 hk-mik motorilimmik. Nulianilu tallimanik qitornaqarput, nukarleq aqqaneq-marlunnik ukioqarluni. Piniartup ukiukkut issitsillugu kiassarnerup akitsorujussuarnissaa naatsorsuutigisinnaalereerlugu oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat