Piniarnermut siunnersuisoqatigiit ataannassapput

oktobarip 07-at 2004 09:54

Aalisarnermut Piniarnermullu Siunnersuisooqatigiit atorunnaarsinneqassanngillat Naalakkersuisunit tusarniaaffigineqartarnerat pingaaruteqartutut isigineqarmat.

Atorunnaarsinneqarnissaat pillugu Demokraatineersoq Palle Christiansen Inatsisartuni siunnersuuteqaraluarpoq. Naalakkersuisut Kattuffissuarnut attuumassuteqarpallaarunnaarnissaat siunnersuuteqarnermini tunngavilersuutigaa, isumaqarluni naalakkersuisut aalajangiisarneranni kattuffiit sunniuteqarpallaalersimasut.

Aalisarnermut Piniarnermullu Naalakkersuisoq Simon Olsen akissuteqarluni oqarpoq siunnersuisooqatigiit siunertarigaat naalakkersuisunut siunnersuisarnissaq.

-Siunnersuisooqatigiinni ilaasortat pissutsinik ilisimasaqarluartuupput qitiusumillu aqutsivallaalinnginnissamut ikorfartuutaallutik, Simon Olsen oqarpoq.

Siunnersuisooqatigiit atorunnaaraluarpata paaseqatigiineq annertunerulersimasoq qatangiinassasoq, taamaattumillu atorunnaarsinneqarnissaat siunertaangitsoq, Simon Olsen isumaqarpoq.