Piniarnermut nakkutilliisut amerlanerusinnaapput
Piniarnermut nakkutilliisut 16-it nunatta sineriaa 2,2 million kvadrat kilometeri nakkutigisassaraat, nakkutilliisinnaasullu amerlanerusariaqartut, Aalisarnermut nakkutilliisoqarfimmi pisortaagallartoq Mads Nedergaard oqarpoq.
- Piniarnermut nakkutilliisut amerlanerulaarsinnaasut isumaqarpugut, tassami piniarnermut nakkutilliisut nakkutigisassaat isorartuvoq. Taamaammat nammaginartumik nakkutiginnissinnaaneq killeqarpoq, Mads Nedergaard oqarpoq, nangillunilu: - Apeqqutaasorujussuuvoq inatsiseqarnerput qanoq ittuunersoq, suullu piniarnermut nakkutilliisut suliassarineraat. Ullumikkut nakkutilliisutut sulisut suliassanik ulikkaarput, ilaatigut nuna eqqissisimatitaq akulikitsumik alakkartartussaammassuk. Aamma sinerissami qanittumi qaleralinnik aalisarneq aammalu kapisilinniartarneq nakkutilliisut nakkutigisarivaat. Taamaammat piniarnermut nakkutilliisut suliassaqangaatsiarput, Mads Nedergaard oqarpoq.
Nakkutiginninneq pitsaanerusoq angorusunneqarpoq, taamaammallu jagtbetjentinik aningaasalersuinermi avitsisinnaaneq pillugu KANUKOKA isumaqatiginiarneqartoq, Mads Nedergaard aamma oqarpoq.
- Maannakkorpiaq KANUKOKA isumaqatiginiarsaraarput. Piniarnermut nakkutiginnittut aveqatigiilluni aningaasalersorneqarsinnaaneri isumaqatigiinniutigineqarput. Pisariaqanngilaq kommunit tamarluinnarmik nakkutilliisunik pilersornissaat. Assersuutigalugu piniarnermut aalisarnermullu nakkutilliisoq Kangilinnguaneersoq kisimiilluni Qaqortoq, Narsaq Paamiullu nakkutigisaraa. Tassani nakkutilliisoq assersuutigalugu ataatsimik ilaqqinneqarsinnaavoq.
Aalisarnermut nakkutilliisoqarfimmi pisortaagallartoq Mads Nedergaard taama oqarpoq.
