Piniarnermut allagartavit maajip aallaqqaataa sioqqullugu akilissagakku eqqaamagiuk

Akiliinngikkuit aasamut piniarnissamut allagartassannik nutaamik qinnuteqarsinnaanngilatit.
Sunngiffimmi piniarsinnaanermut allagartallit 57 procentiisa uppernarsaat apriilip ulluisa 15-ianni akilereersimavaat. Toqqorsivimmit assi
Allattoq Malik Brøns
apriilip 20-at 2020 12:36

Aalisarnermut, Piniarnermut Nunalerinermullu Naalakkersuisoqarfik sunngiffimmi inuussutissarsiutigalugulu piniartunut tusagassiuutinut taama eqqaasitsissuteqarpoq.

Piffissami qinnuteqarfiusumi nunatsinni sivikinnerpaamik ukiuni marlunni ataannartumik najugaqareersimanissaq piumasaqaataavoq.

Tuttunniarnissamut umimmanniarnissamullu akuersissutit tunniunneqartartut affai inorlugit taamaallaat utertinneqartarnerat pissutigalugu naalakkersuisoqarfik eqqaasitsissuteqarpoq.

Akuersissutit pisanillu nalunaaruteqarneq piniarnerup naammassineqarnerata kingornatigut kingusinnerpaamik sapaatip akunnerisa marluk qaangiunneranni utertinneqartussaapput tamannalu pisaqarsimanngikkaluaraanniluunniit aamma atuuppoq.

- Pisanut nalunaarutit amigartumik utertinneqartarnerat pillugu tuttoqatigiit umimmaqatigiillu qanoq innerat nalileruminaassisarpoq, naalakkersuisoqarfik allappoq.

Sunngiffimmi piniarsinnaanermut allagartallit 57 procentiisa uppernarsaat apriilip ulluisa 15-ianni akilereersimavaat.

 Inuussutissarsiutigalugu piniarnermut allagartallit pitsaanerupput. Taakku 86 procentii apriilip ulluisa 15-ianni akileereersimapput.