Piniarneq aalisarnerlu unitsiinnaraanni pitsaanerulerunartoq siulittaasoq oqarpoq
Puisip amiata akiata appartussanngornera pillugu isumaqatigiittoqarmat, KNAPK annerusumik iliorsinnaasimanngilaq.
Piniartoq puisimik pisaqarsimatilluni amianik tunisaqarnermini 301 koruunimik oorisiaqartaraluarpoq.
Isumaqatigiissutigineqartorlu nutaaq naapertorlugu
piniartup maanna puisip amia 215 koruuniinnarmik oorisissutigisalissavaa. Tassa imaappoq, piniartoq puisip amianik tunisaqarnermini 86 koruunimik oorisiassaa annikinnerulissaaq.
KNAPK-p siulittaasua Peter Olsen oqarpoq, isumaqatigiissusiaq taamaattoq KNAPK-mut periarfissiinerunngitsoq.
- Pituttoreerlugu aaqqitaavoq, uagullu qanoq iliuuseqangaarsinnaanngilagut, Peter Olsen oqarpoq.
“Qilersorneqareersimammat isumaqatiginninniutissaqanngilagut, isumaqatigiissut amminut 20.000-inut agguarneqartussatut aalajangereerneqarsimappat, taamaalilluni ammimut ataatsimut 65 koruuniinnarmik tapiinissaq aalajangerneqareersimavoq. Taamaattumik uagut maanngaanniit suna isumaqatiginninniutigissanerlugu naluarput, Peter Olsen oqarpoq.
Taanna aperaarput piniartoq 86 koruuninik annaasaqarpat taakkununnga qanoq kinguneqartarumaarnersoq.
“Isertitat annikilliartortillugit illuatungaanillu aningaasartuutit qaffakkiartortut, taanna ajorpoq!
Piniartut aalisartullu atukkamikkut eqqugaagaluttuinnarnerat akuersaarneqarsinnaanngilaq, eqqarsarnartorujussuuvoq qanoq arlaatigut iliortoqarsinnaanissaanik”, Peter Olsen oqarpoq.
Taanna qinnuigaarput arlaannik iliuuserisinnaasamik assersuuteqarsinnaannginnersoq.
“Aalisartut piniartullu kajumissaaginnarsinnaavakka eqqarsaqqullugit. Apererisariaqarpunga aalisakkanik puisinilluunniit tunisassiorneq tamarluinnaat unitsiinnaraanni pitsaanerulinnginnersoq”, Peter Olsen naggataatigut oqarpoq.
