Piniakkat aalisagartassiissutillu amerleqquaat
KNAPK-p immikkoortortaqarfiisa pisortanut oqariartuutaat aalisartut piniartullu ullorsiorneranni pisortanut apuunneqarnissaat, KNAPK-mi siulersuisut oktobarip ulluisa 29-anni ataatsimiinnerminni aalajangerpaat.
Piniakkat aalisagartassiissutillu amerlineqarnissaat piumasaqaataapput, aalisagartassiissutini pingaartumik sinerissap qanittuani qaleralittassiissutit 22.000 tonsinut qaffanneqarnissaat piumasarineqarluni.
Taamatut pisassiisoqassagaluarpat qalerallit nungukkiartulernissaat aarleqqutigineqarsinnaava?
KNAPK-p siulittaasua Leif Fontaine akivoq:
- Aalisartut taama isumaqanngillat, qalerallimmi qaleraleqarfinni takussaaleraluttuinnarput, allaammi siornatigut aalisarfiusimanngitsuni takussaalersimallutik. Ilisimatuussutsikkut misissuinerit aamma takutippaat avataani suffisarfiusuni qalerallit amerliartulersimasut. Taamaammat aalisartut amerlanerusunik pisassinneqarnissamik piumasaqarnerat tupinnanngilaq, Leif Fontaine oqarpoq.
Taamatummi piumasaqassalluni akisussaassuseqarnerua?
- Akisussaassuseqartumik iliuuseqartoqassappat, taava ilisimatuussutsikkut misissuinerit sinerissap qanittuaniittut annertusarneqartariaqartut aalisartut isumaqarput. Paasissutissammi ersarinnerusut pigineqalerpata qaffaasinnaanissaq aqqutissaasoq isumaqartoqarpoq, KNAPK-p siulittaasua oqarpoq.
Piumasarsi angussagaluarussiuk ukiup ingerlanerani qaavatigut pisassinneqaqqinnissamik qinnuteqartarnersi oqaluttuaanngussava?
- Isumaqarpunga una ersarissoq: Pisassat pisassiissutillu qaffanneqassagaluarpata, taava aalisartut piniartullu ulluinnarni inuuniarnermi inuussutissarsiornermilu atugaat pitsaanerulissagaluarput, naammaginninnginnerillu sukkasuumik qaangiutissagaluarpoq, KNAPK-p siulittaasua Leif Fontaine oqarpoq.