Pingasunngornermi ullaakkut Nuummi kingumut innaallagiaqanngilaq

Nuummi sumiiffiit arlallit kingumut innaallagiaqanngillat. Nukissiorfiit allapput, innaallagissap iluarsinissaa suliarigitsik.

Pingasunngornermi ullaakkut nalunaaqutaq 7 Nuuk qamittooqqippoq. Tassa illoqarfiup qeqqani Nuussuarmilu qamittooqqittoqarmat.

- Ullaaq manna ajoraluartumik Nuummi sumiiffinni arlalinni sarfaaruteqqippoq. 

Utoqqarmiut Kangerluarsunnguani erngup nukinganik innaallagissiorfimmut aqqut suli attaveqarpoq Qinngorpullu innaallagissamik pilersorlugu. Atuisartut tamaasa sukkanerpaamik innaallagissamik pilersuleqqissinnaaniarlugit Nukissiorfiit teknikeriisa ajoqutaasoq nassaariniarsaraat. Nutaarsiassaateqalerutta piaarnerpaamik nalunaaruteqassaagut.

Nalunaaqutaq 8-p missaani Nukissiorfiit Facebookikkut nalunaarput, Nuup ilaani innaallagissamik pilersuisoqaleqqittoq.

- Nuup ilaani innaallagissamik pilersuileqqippugut, sinnerilu pilersuleqqinniarlugit Nukissiorfiit teknikerii ulappupput. Ingerlaavartumik paasititsisassaagut, paasinnilluarassilu qutsavigaatsigit.

Kommuneqarfik Sermersooq aamma Facebookimi allappoq, atuarfiit paaqqinnittarfiilllu qamittooqqasut matoqqassasut, sulili sulisut suliffimminni meeqqanik takkuttoqarpat isumaginnissinnaasut.

Tusass-ip kalerrisaarutigaa, Nuummi qamittooqattaarneq pissutigalugu oqarasuaatikkut internetsikkullu atassusiiniarneq unammillernartoqartarsinnaasoq.

Ataasinngornermi marlunngornermilu Nuup ilaani akunnerit 18-it tikillugit innaallagiaqanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl