- Tupannermut tamatta soorunami qanoriliuusissaaruppugut kisianni nuannerpoq, pingasulissanut anaananngorlaaq, Paninnguaq Larsen oqarpoq.Assi: Andreas Poulsen / KNR

Pingasulissanik ukiut qulit iluanni siullermeertumik Nuummi inunngortoqartoq

Aappariit Paninnguaq Larsen aamma Emil Mathiassen pingasulissanik sapaatip akunnerata siuliani meerartaarput. Taakku nunaqarfimmi Kitsissuarsunni najugaqarput, Dronning Ingriup Napparsimmavissuanilu meerartaarlutik.

Aappariit Paninnguaq Larsen aamma Emil Mathiassen Kitsissuarsunni najugallit oktobarip 19-iani pingasulissanik meerartaarput.

Meerartaartussanngoramik allatuulli ataasiinnarmik meerartaassasoreqqaaraluarput, allatorluinnarli paasitinneqarput:

- Siullermik oqaramik marlulissanik naartusunga, assorujuk tupappugut, qiangeerlunga. Taava kingorna specialistip sunaaffa Aasianniinnerata nalaani scannertillunga, taava aggertikkamikku takuniaraanngooq. Taava kingorna paasivarput pingasulissanik naartullunga. Qiajunnaapiloorpunga tupannermut tamatta soorunami qanoriliuusissaaruppugut, kisianni nuannerpoq.

Naatsorsuutiginngisamillu tusartinneqarneq imaannaanngitsuuvoq:

- Soorunami tupaqqavunga uppernaranilu, sulimi massakkut. Taanna nassuiaruminaappoq, misigisara nuanneruttormat aamma allaagami ukua, taamatut ilimasunnikuunngikkaluaratta.

Naartunera annertuumik kingunerluuteqanngitsoq

Nunaqarfimmilu najugaqarneq ilaatigut napparsimaveqarfilimmit naartunermiit allaaneruvoq.

Pingasulissanik naartuneq arlaatigut kinguneqarsinnaasoq Paninnguaq Emililu paasitinneqarput. Pingasulissallu paariinnassallugit aalajangersimapput.

- Arlaat toqoriataartoq imaluunniit innarluuteqartoq tamaasa annaassanngikkutsigit taamannak arlaat peertissinnaavat taamannak aallaqqaammut sianerfigitittajaalerama soorunalimi assoroornarpoq kisianni oqarpunga; naamik tamaasa paariniarpagut.

Piffissaliussarlu sioqqullugu, tassa naartunerani sapaatip akunnerisa 31-ssaanni tassanngaannaq ernisussanngorpoq, Nuummilu pilatsilluni meerartaartussanngorpoq.

Ernisussiortullumi aallaqqaammut pingasulissat nukappiaraannaasut misissuinerminni paasivaat. Niviarsiaqqallu marluusut ataaserlu nukappiaraasoq Paninnguup naartunerata ingerlanerani misissueqqittoqarmat paasivaat. Angajoqqaajusullu meeqqamik atissaanik aalajangiissallutik eqqartuisarsimapput.

- Uanga panissaarusuttorujuusarama taava oqarnikuuvunga nukappiaraassappata atsissangai ataataasup. Taava tamarmik atissarsipput ataataasup nukappiaraq atserpaa, uanga niviarsiaqqat. Taava inunnguleriallaramik nukappiaqqat marluk niviarsiararlu. Taava atissaaruttoorparput suli ataaseq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat