Pingasulik Diskomukartaatiginiarpaat
Umiarsuarmik takornariartitsisarneq immikkut ittumik aappaagu misigisaqarfiusinnaassaaq, tassa umiarsuaaraq pingasulik Rembrandt van Rijn Nunatta Kitaata sineriaani angalasussanngormat.
Allattoq Elisa Isaksen
maajip 16-at 2011 07:30
Umiarsuaatileqatigiiffiup 50 Degrees North-ip, umiarsuaaraq tingerlaasersuutigisoq 1900-kkut aallartilaarneranni ammassassuarniutitut sanaajusoq pissarsiarisimavaa. Taanna 1994-imi allanngortiterlugu pingasunik napparutilerlugu sananeqarpoq, tamatumalu kingorna Inngikitsulimmi, tassa Svalbardimi Spitsbergenimut aamma Galapagos-ip qeqertaannut angalasarluni.
Maannalu tassa allanngortiterneqareerluni 34-nik ilaasoqarsinnaalerpoq. Umiarsuaaraq qulinik inuttaqarpoq neriniartarfeqarlunilu.
Rembrandt van Rijn 2012-imi aasakkut Kitaata sineriaa tamakkerlugu takornarianik angallassisassaaq, angalaneq ataaseq 10.000 koruunit 33.000 koruunillu akornanni akeqassalluni.
Takornariartitseqatigiiffiup nittartagaa ataani aamma alakkarsinnaavat:
