Paneeraq Noahsen Nakorsaaneqarfimmi nakorsaavoq. Arkivfoto.Assi: KNR

Pingajussaanik akiuussusersuineq avannaani aallartereerpoq sinerissamilu tullinnguupput

Utoqqaat katsorsarneqarsinnaanngitsumillu nappaateqartut, akiuussutisamik nakorsaasiorfimmit Pfizer/BiONtechimeersumik pingajussaanik akiuussuserneqassappput. Sinerissami illoqarfinni anginerni pingajussaanik akiuussuserneqartussat sianerfigineqarlutik aggersarneqassapput, Nuummili allagarsiinikkut nalunaarutigineqassaq.

Innuttaasut 65-nik ukioqalereersimasut katsorsarneqarsinnaanngitsumillu nappaateqartut akiuussutissamik pfizer/Biontechimieersumik akiuussusersuineq Ilulissani sapaatit akunnerani kingullermi aallartinneqarpoq, kingusinnerusukkullu nunatta sineranni akiuussusersuisoqassalluni.

Nunatsinni innutaasut 71 procentii siullermeerlutik akiuussuserneqareerput, 65 procentiilu marloriarlutik akiuussuserneqarlutik. 

AAMMA ATUARUK Nuummi aaqqissuinerup kingorna corona kommunenut tamanut tuniluuppoq

Tamanna Nakorsaaneqarfiup nittartagaani atuarneqarsinnaavoq. Maannalu pingajussaanik akiuussusersuineq aallartereerpoq. 

Maannali peqqinnissamut ilisimatuut naliliinerat naapertorlugu akiuussuserneqarnermiit qaammmatit arfinillit qaangiukkaangata akiuussutissap sunniutaa sakkukillisartoq.

- Paasisat kingullit takutikamikku ukioqqortunerni taava inunni nappaatilinni akiuussutissap iluaqutaanera qaammatit arfinillit qaangikkaangata appariartulersartoq, taamaattumillu utoqqartagut, akiuussutissamik kapitereersimagaluarlutik perulunnissaminnut aarleriartorsiorsinnaallutik, pingajussaanik akiuussutissamik kapitinngikkunik, taamaattumik neqeroorfigineqarput pingajussaanik kapitinnissamminnut, nakorsaaneqarfimmi nakorsaq Paneeraq Noahsen taama oqarpoq.

Pingajussaannik akiuussusersuineq sapaatit akunnerani kingullemi aallartinneqarpoq.

Ilulissani 65-nik ukioqalereersimasut peqqinnissaqarfimmi utoqqaallu angerlarsimaffiini sulisut akiuussuserneqarlutik.

AAMMA ATUARUK Landslæge: Alle får tilbudt tredje corona-vaccine i 2022

Paneeraq Noahsenip oqanera naapertorlugu, illoqarfinni anginerni akiuussutissamik pfizer/biontechimik qaammatit arfinillit matuma siorna akiuussuserneqartut peqqinnissaqarfimmit aggersarneqarumaarput pingajussaanillu akiuussuserneqarnissaanik neqeroorfigineqarumaartut, tamannalu sapaatit akunnerata tulliani pissasoq.

Nuummi pingajussaanik akiuussuserneqarnissaminnik neqeroorfigineqartussat aggersarneqaratik allagartanik nivinngaanikkut neqeroorfigineqassapput.

- Nuummi peqqinnissaqarfik immikkut nittarsaajumaarpoq, akiuussuserneqartussat tamakkerlugit ataasikkaarlugit aggersarneqarsinnaannginnamik Nuummi inuit amerlanermik, Paneeraq Noahsen nakorsaaneqarfimmi nakorsaq taama oqarpoq.

Kalaallit Nunaanni innuttaasut tamarmik pingajussaanik akiuussuserneqarnissannut peqqinissaqarfinni oqartussaasut akuersissuteqarnissaat utaqqineqarpoq.

Paneeraq Noahsenip oqarnera naapertorlugu tamanna pissuteqarpoq nakorsaasiorfiup Modernap kikkut tamarmik pingajussaanik akiuussuserneqarnissaannut peqqinnissaqarfinni oqartussaasut akuersissuteqarnissaat utaqqineqarmat.

Nunatsinni coronavirusi pillugu
killiffik

Tunillatseqqasut 300  
Ullumi tunillatsittut 124  
Siullermik kapitissimasut 71%  
Aappassaa kapitissimasut 66%  
Tunillanneqarsimasut 1456  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Novembarip 29-at 13:15
 

Coronavirusimik tunillatsinissaq pinaveersaaruk