Pingaarutilinnik suliassaqalerneq peqataannginnermut patsisaavoq

Sisimiuni Polar Fiship arfinilissaanik nittarsaanneqarneranut atatillugu Aalisarnermut naalakkersuisutut peqataannginnera aalisarnermut pingaarutilinnik naalakkersuisuni ataatsimiinninnik pissuteqarpoq, Finn Karlsenip oqarpoq.
Allattoq Elisa Isaksen
septembarip 16-at 2008 17:02

-Alisarnermut atortunik takutitsineq nalliliivissoq pingaaruteqarluinnaqqissaartumik Naalakkersuisut tamattaalluta ataatsimiittussanngorpugut tamatumalu kingorna aamma atorfilittat ilagalugit sisamanngormat pisariaqavissumik suliaqarpugut, taamaammat pinngitsoornanga Nuummiittariaqarama aallanngitsuuinnarpunga, aamma ilisimatitsivunga tamanna sioqqullugu. Finn Karlsen nassuiaavoq.

Tunumi aamma Ilulissani aalisariutaatileqatigiit pisassinneqarnermi nalaani aalisariutaateqanngittut pisassinneqarsimanerinut aammalu raajarniarnermut tunngasut ilaatigut naalakkersuisuni atorfilittat peqatigalugit pingaarutilittut ataatsimiissutigineqarsimapput.

-Soorunami aalisarnermut atortunik takutitsineq pingaartorujusuuvoq, ukiut pingasut naalakkersuisuuninni aappassaa taamaattoqarpoq, siullermi ammaanermi 2-3 minutsit oqalugiarpunga ullullu sinnera isiginnaartuinnaavunga aalisartunillu annerusumik atorfissaqartinneqarnanga, aappaatigut tamanna tupinnanngilaq, niuernermut tunngavoq annerusumik politikimut tunnganngilaq.

Finn karlsen peqataannginnerminut nassuiaateqarluni taama oqarpoq.